Узу Табасаран райондиз кми-кмиди гъягъюри шулза, ва аьхиримжи вахтна багъри юрднаъ гъягъюрайи дигиш’валари юкIв шад апIуру. Улихьган, райондин гъуларин аьтрафар зирзибили, шюшйири, пластикдикан гьязур дапIнайи жюрбежюр шей’ари ул рубкьрубси ккаънайиган, аьзият шуйи. Фикир гъюйиз: яраб, му уткан юрд’ина мициб мешребсузвал хурайидари фтикан фикир апIурайкIан? Гьаз сар касдикьан, улихь гьучIвну, му абурсуз ляхнарин улихьишв гьадабтIурадар?
Хъа гъи вари Табасаран район хъанара, улихьганси уткан мурччваз дюнмиш шула. Вари гъулариъ гьар киш йигъан, бязиган элгьет йигъарира, аьхю субботникар гъягъюра, марццишин цIийикIултIан уьмрин асуларикан саб шула.
Улихьган чвул улубкьган вая хьадукран вахтна пуч духьнайи рякъяр удучIвуз даршлу, штухъди ацIнайи аьхю ичIариз дюнмиш шуйи, хъа имбу фаслариъ дурар, дявдин женгариъ гюллдихь гьахьганси, ичIари ва чухрари сифраз ухшар апIуйи ва машиндиъди гъягърюдариз кьадарсуз аьзиятар тувуйи. Имбу районарин, гьадму гьисабнаан дагълу районарин рякъярихъди тевиган, ихь юрдариз вуйи рякъярин гьялну райондин агьал-йирин язухъ зигуз гъитуйи. Иллагьки, «Встречайихъан» Хючназ гъюру рякъ. Гьамус думу, асфальт улубзну, рас дапIна. Райондин аьтрафариин али жара рякъярра къайдайиз хура.
Рибчрай, Табасаран райондин дамагъ, харжи кейванийин гъаб-гъажагъси, чиркинди шуйи; эргвал йивуз дуфнайидариз деуз тялукь йишвар адарди, гургутум гъюргъю шюшйир, йирси пакетар дахьну, бетер гьялнаъ айи. Гъи Рибчрайихьна гъябгъру рякъ, асфальт улубзну, утканди дебккна, ла-йикьлуди хялар кьабул апIуз шлу йи-швар тикмиш дапIна.
Табасаран халкьдин кьягьялвалин ядигар – Ургур чвуччвун ва сар чу-ччун гъала – цаларин машар авам касарин дикIбари алацIну, аьтрафариъ зирзибил дабхьну, машинар гъягъюз ужуб рякъ хътарди, йитимси дипнайи. Гьамус гъалайиз кьюбпи уьмур тувна – дина турбйириъди шид дизигна, юрд ахтармиш апIру музей тикмиш дапIна, гъван ккабхьну, гургутум мягьражар хъивну, цалар марцц дапIну, йишвну неоновый аквар кархьри уткан дапIна.
Ццийин йисан Табасаран райондиъ кIули гъушу гьаму жюрейин хайлин жара дигиш’валарра ктухуз шулу.
Улихь-кIулихь хьайирин апIурайи ляхнихъан, багъри юрднахъан юкIв убгруган, йицIбар йисариинди батлагъдиз дюнмиш шулайи район цIийи рякъюзди илтIибкIуз шуйиштIан! Марцци гьиссар кIваъ итну, намуслуди ляхин ккебгъиган ва имбудариз райондин кIулиъ айири нумуна улупруган, аьдати агьалйирин умударра чIиви, лихуз аьшкьра артухъ шуйиштIан!
Гьелбетки, хайлиндариз райондин главайи гъадабгънайи ляхнин егинвал кьабулди дар, дурари, зиълан ачухъвал, машнаъ инчI улупури, хъа гъархну ацIнайи юкIвариъ чIуру кьастар дидисну, манигъвалар апIура ва апIиди. Вушра, умуд кивуз шулу, багъри уьлке дурумлуди артмиш’валин рякъюъ убчIвна. Йиз му фикрарин дюзвал, райондин 90-йисандин юбилейихьна вуйи гьязурлугари ва юбилей заан дережайиъди кIули гъубшували субут гъапIну.
Юбилей улдубчIвну, хъа уьмур давам шули ими. Гьаддиз гъи ихь гьарсарин, ватандашдин ва ватанперверин вазифа – багъри юрд уткан апIбак, инсанарин дережа за апIбак ухь’ан удукьру лайикьлу пай кивувал ву. Фицики, ихь ата-бабйири кIуруганси, элин гуж аьхюб ву, жямяаьтдиз ккун гъабхьиш, юртнан ккумра жилиз гъябгъюру.
