Октябрин 15-пи йигъан Дагъустандин гьюкуматдин университетдин конференцйир гъахру залиъ Дагъустандин журналистарин Союздин юбилейиз бахш вуди «Бабан чIал ва культура уьрхбак милли прессайи киврайи пай» ччвур тувнайи илимдин конференция кIули гъубшнийи.
Серенжемдиъ милли СМИ-йин редакцийирин, чапханйирин, республикайин министерствйирин, илимдин жямяаьтлугъдин вакилар, вузарин милли чIаларин факультетарин студентар иштирак гъахьнийи.
Цирклиъ арайиз дуфнайи аьгьвалатнакан республикайин журналистарин Союздин председатель, «Гьякьикьат» газатдин кIулин редактор Аьли Камаловди ктибтнийи. Дугъу къайд гъапIганси, милли газатарин ва журналарин тиражар йислан-йисаз ис шула. Му ляхин дугъу дагъустанлуйири чIалнан ва милли культурайин месэлйириз фикир туври адрувалихъди, «Урусатдин почта» ФГУП-дин гъуллугъчйири газатар ва журналар эйсйирихьна рукьбан гьякьнаан чпин вазифйир лазим вуйиси тамам дарапIрайивалихъди аьлакьалу гъапIнийи.
ДГУ-йин дагъустан чIа-ларин кафедрайин заведующий Муса Бягьмудовди чан докладдиъ республикайин мектебариъ милли чIалар кивбахъди аьлакьалуди арайиз дуфнайи аьгьвалатнакан мялуматар тувнийи. «Аргъаж шулайи наслариз бабан чIал, милли культура аьгъю апIуз ккундар, гизафси жигьилариз чпин бабан чIалра аьгъдар», – къайд гъапIнийи дугъу.
М.Бягьмудовди, айи аьгьвалатанаан удучIвбан бадали гьапIну ккундуш, чан теклифар арайиз адагънийи.
Чан удучIвну улхбаъ гизаф йисари Дагъустандин Аь.Аь.Тахо-Годийин ччвурнахъ хъайи педагогикайин НИИ-йин директорди гъилиху Гьямидуллагь Мягьямедовди министерствйирин ва идар-йирин вакиларикан чIал уьбх-бан месэлйирихьна вуйи чпин вижнасуз янашмиш’вал дигиш апIувал ккун гъапIнийи, фицики, чIал – халкьдин рюгь ву. Дугъу гьацира бабан чIалнан дарсариз бицIидар гьадраъру абйир-бабарра тянкьид гъапIнийи.
Гьелбетда, му учIру месэла конференция гъабхувалиинди ккудубкIруб, ясана чав чаланди гьял шлуб дар. Милли газатари ва журналари, чIал дудругбан, культура уьбхбан бадали, чпихьан удукьру ляхин апIура. Хъана артухъдира ляхин апIуз гьязурди а. Гьаци вушра, СМИ-йин кюмекниинди чIал уьбхюз читинди ву. Фицики, абйир-бабариз милли газатариз, журналариз подписка апIуз пул гьяйифди шулу. Гьамусяаьт гъюру йисаз газатариз подписка апIру вахт улубкьна. Эгер ичв бицIириз чIал аьгъю дубхьну ккундуш, газатдин подписка апIинай, газат хулаз гъабхиган, бицIидарихъди сатIиди думу урхай. Мектебариъ айи мялимарира гьяфтайиъ саб ражари табасаран чIалнан газатар ва журналар урхбан дарс тешкил апIуйиш, гизаф ужу шуйи. Ихь милли газатдихъди аьлакьа уьбхяй. Ичв теклифариз ва аьрзйириз лигуз учу гьаммишан гьязур вуча.
