Гьюрматлу ватанагьлийир, «Табасарандин нурар» газатдин улдукьу дустар, гьаммишан газатдин подписка апIурайи варитIан ихтибарлу касар. Гъи учвухьинди илтIикIури, гъулайсузвалра, разисузвалра гьисс апIури, «Табасарандин нурар» газатдин 2020-пи йисаз подписка апIбан кьимат за гъабхьивалкан мялум апIурача.

Му дигиш’вал ич ляхнихъди аьлакьалуди гъабхьиб дар, хъа РД-йин УФПС-ди 2020-пи йисаз газатдиз подписка гъапIу касарихьна думу гъабхбан ва хътапIбан тарифар 10% за гъапIувалихъди аьлакьалуди арайиз гъафиб ву. «Табасарандин нурар» газат 2020-пи йисаз РД-йин УФПС-диан мина 6 вазлиз подписка гъапIу касарихьна гъабхбан ва хътапIбан кьимат, зиихъ тувнайи мялуматназ асас вуди, 50 манатна 4 кепкин, хъа 12 вазлиз вуйи кьимат – 99 манатна 98 кепкин за хьибди. «Табасарандин нурар» газат «Дагъпечатдиан» подписка апIбан кьимат 6 вазлиз 21 манатдин, 12 вазлиз – 42 манатдин багьа хьибди.

Газат подписка апIбаъ гъахьи дигиш’валариз лигну, «Табасарандин нурар» газат 2020-пи йисаз РД-йин УФПС-диан подписка апIбан кьимат 6 вазлиз 287 манатна 88 кепек, хъа 12 вазлиз – 575 манатна 82 кепек хьибди. Хъа 2020-пи йисаз газат «Дагъпечатдиан» подписка апIбан кьимат 6 вазлиз 105 манат, 12 вазлиз – 210 манат хьибди.

Газатдиз подписка апIбан кьиматариъ гъахьи му бицIи дигиш’валариз дилигди, гьюрматлу ватанагьлийир, учву гележегдиъра ихь милли газатдихъди сигъ аьлакьа уьбхиди, дидин «хил» бисиди ва гьарури думу уьбхюз чахьан шлу кюмек апIиди кIури, умуд киврача. Гьаз гъапиш «Табасарандин нурар» газат табасаран халкьдин рюгь, ихь чIал, культура, тарих, аьдатар уьрхюрайи, текрар апIуз даршлу дакьат ву.

«Табасарандин нурар» газатдин
редакцияйин коллектив