Дагъустан Республикайин милли политикайин министерствойин жягьтлувалиинди, октяб-рин 21-ди къайд апIурайи Дагъустандин культурайин ва чIларин Йигъан дахилнаъди, республикайин милли чIалариинди диктантар дикIури магьа шубудли йис ву. Му баркаллу ляхник чпин пай Табасаран райондин бабан чIал мялимарра кивра.
Октябрин 21-пи йигъ Хючна гъулан сабпи нумрайин кьялан мектебдиъ, Дагъустандин культурайин ва чIаларин машквриз тялукь вуди, Табасаран райондин образованиейин управлениейи, табасаран ва азербайжан чIалариинди, хъа табасаран райондин Гелинбатандин кьялан мектебдиъ агъул чIалнииндира диктантар гъидикIну. Диктант бикIбаъ райондиъ айи вари мектебариъ бабан чIалнан дарсар кивру мялимар, гьацира заан классариъ урхурайи баяр-шубар иштирак гъахьну.
*********
Дагъустандин чIаларин ва культурайин Йигъ къайд апIури, 21-пи октябриъ Хив райондин мектебариъ бабан чIалнан ва литературайин дарсариан диктант, гьярфар гъидирчнайи илчIихбар, кIул’инди вуйи ахтармиш апIбан ляхнар гъухнийи.
КТНД-йин, дагъустандин тарихдин, дагъустандин литературайин дарсариъ урхурайидариз, дагъустан халкьарин аьдати палтарикан, милли хурагарикан, аьдатрикан ва насларикан, дустваликан ва хялижв кьабул апIуваликан яркьуди ктибтнийи, презентацйириз, видеороликариз, Расул Гьямзатовдин «Йиз Дагъустан» кIуру кинофильмдиз гъилигнийи. Мидланра гъайри, Хив райондин бязи мектебариъ урхурайи баяр-шубар Хивна музейизра хъади гъушнийи.
Аьхириъ мялимари урхурайидариз, серенжемариъ гъадагъу аьгъювалар ишлетмиш дапIну, гъюру дарсариз дурар гьам кIул’инди вуйи сочиненйириъ, изложенйириъ атIагбан табшуругъ тувнийи.
