Гьаму гьяфтайин эвелиъ Табасаран райондин Кьюрккарин кьялан мектебдиъ йирхьубпи «а» ва йирхьубпи «б» классариъ урхурайидарин арайиъ «Паччагь урус чIал ва бика урус литература» темайиан конкурс гъабхьну.
Классдиъ дару думу серенжемдин метлеб – урхурайидарин урус чIалнаан вуйи аьгъювалар дерин апIувал, савадлувал за апIувал, тянкьидвалиинди фикир апIбан терефар артмиш ва мюгькам апIувал, урус чIал ва улупнайи предметдиан заан аьгъювалар айидар ашкар апIувал вуйи. Конкурс Александр Сергеевич Пушкиндин яратмиш апIбариз бахш дапIнайи. Къайд дапIну ккундуки, кьюбби классариъ урхурайидарра конкурсдиз ужуди гьязур духьнайи, амма, жюрийин улупбариинди, варитIан заан натижйир йирхьубпи «а» классдиъ урхурайидари улупну (урус чIалнан ва литературайин дарсар киврайи мялим Алиса Мягьмудова). Дурари сабпи йишв гъазанмиш гъапIну.
Урхурайидарин арайиъ варитIан заан активвал йирхьубпи «А» классдиан Мальвина Рашидовайи ва йирхьубпи «б» классдиан (урус чIалнанна литературайин дарсар киврайи мялим Надир Мирзаев) Ислам Гьяжиуьмаровди улупну.
