Февралин 20-пи йигъан Республикайин МФЦ-йиъ онлайн жюрейиинди РД-йин мал-девлетнанна жиларин месэлйириз лигру Министерствойин республикайин муниципалитетарихъди гъулан мяишатдиъ ишлетмиш апIру жиларин месэлйириз бахш дапIнайи пресс-конференция гъабхьну.

Конференцияйиъ республикайин мал-девлетнан ва жиларин месэлйириз лигру министр Екатерина Толстикова, РД-йин гъулан мяишатдин ва ипIру-убхъру сурсатарин Министерствойин вакилар ва хайлин жара касар иштирак гъахьну.

Онлайн жюрейиинди кIули гъубшу конференцияйиъ Табасаран райондин «Турагский» гъулан поселениейин глава Аьбулфет Шихимиевди Дербент райондин жилариин ерлемиш дубхьнайи «Турагский» СПК-йин гьяракатниинди гьял дапIну ккуни месэлйирин гьякьнаан министриз мялуматар тувнийи. Дугъан гафариинди, «Турагский» СПК-йин жилар 2009-пи йисан «Турагский» гъулан поселениейи РД-йин мал-девлетнанна жиларин месэлйириз лигру Министерствойихьан арендайиз гъадагъу жилар ву. Думу жиларин гьякьнаан 2014-пи йисан «Турагский» гъулан поселение суддиъра гъалиб гъабхьну. Гъийин йигъаз думу жилариин 2 фермара (85/10 ва 40/10) ва чабнариз кьюб халра тикмиш дапIна. Амма гьамусяаьт Дербент районди Табасаран райондин хиликк ккайи му жилар чпин хусусивализ гъадагъура.

Гьацира Аьбулфет Шихимиевди Минсельхоздин вакиларихьан «Турагский» СПК-йиз газ, акв ва шид зигуз кюмек апIувалра ккун гъапIнийи.

Му месэла РД-йин гъулан мяишатдин ва ипIру-убхъру сурсатарин Министерствойи чан гюзчиваликкна гъадабгъну.