Яв баяр, Табасаран
Гъи уьлкейин гьякьикьат дибдиан дигиш шули, жигьиларин уьмрихьна вуйи лигбар асла жарадар шулайи вахтна, ухькан гьарсар, шаксуз, багъри Ватандин хайирназ вафалуди зегьмет зигурайи, Яракьлу Кьувватарин жерг-йириъ гъуллугъ апIури, ужудар хъуркьувалариинди лишанлу шулайи кьягьял ватанагьлийириин дамагълу ву. Хъа Урусатдиз вафалувалиинди гъуллугъ апIурайи кьягьяларра ухьуз хайлин ахьуз.
Ватанпервер жигьиларин арайиъ Хив райондин ГъуштIил гъулан вакил Альберт Ферзялиевди лайикьлу йишв дибисна.
Багъри гъулан мектеб ужудар аьгъювалариинди ккудубкIу жигьили, Ватандиз гъуллугъ апIбан метлебниинди, 2006-2011-пи йисари Воронеждин дявдинна авиацияйин инженервалин университетдиъ (гьамусяаьтна Н.Е. Жуковскийин ва Ю.А.Гагариндин ччвурарихъ хъайи ВУНЦ ВВС ВВА) урхуб давам гъапIну. Гьадушв’ан жигьил лейтенант Краснодарин заан дявдинна авиацияйин летчикарин училищейин Кущевский станицайиъ ерлешмиш дубхьнайи 797-пи авиацияйин полкназ аэродромарин техникайин тяминвалин инженервалинна аэродромарин взводдин батальондин командирин гъуллугъниина гьаъру. Чан вазифйирихьна намуслувалиинди янашмиш шулайивализ лигну, дугъаз 2013-пи йисан аьхюну лейтенантдин, хъа 2016-пи йисан капитандин звание тувну. Гьадму 2016-пи йислан мина Альберт Ферзялиевди зиихъ улупнайи полкнан авиацияйин 2-пи дережайин базайин инженервалинна аэродромарин далуйин гъуллугънан начальникди гъуллугъ апIура.
– Узу бицIи вахтналан мина дявдин гьяракатарикан вуйи фильмариз аьхю аьшкьниинди лигури шуйза. Хъа узу йиз уьмрин рякъ Ватандиз гъуллугъ апIбахъди аьлакьалу апIбаъ «Офицерар» кинойи асас роль уйнамиш гъапIну. Дидин гьядисйириз лигури, узу йиз уьмур ижмишнаан Ватандиз гъуллугъ апIбаз сарф апIуз ният гъапIунза. Мектеб ккудубкIу сабпи йисан узу курсантарин жергйириз кьабул гъапIундаршра, йиз метлебнахьан ярхла гъахьундарза. Вахтар ухди гъягъюру: узу уьмур Яракьлу Кьушмарихъди сатIи дапIну, гьамус 12 йис ву, амма сабанра му рякъ ктабгъбиин швумал гъахьундарза.
Ватандиз гъуллугъ апIувал, гьелбетда, рягьят ляхин дар. Варидари эрг’вал йивруган, уву гъуллугъниин хьуб чарасуз ву. Хизандихъдира увхьан ккуниганси вахт адапIуз шулдар. Хизандихьан, увуз багъри инсанарихьан хайлин муддатнаъди ярхла командировкйириз гъягъюб алабхъуру. Хъа узуз, тялукь аьгьвалатнаъ вари читинвалар аьгь дапIну, намуслуди гьюкуматди улихь диву метлебарихъ хъуркьуз йиз хизанди кьувват тувразуз. Хизан далу вуйиз. Фунуб дюшюшдиъра Ватандин намус ва азадвал уьбхюз гьязур вуйиб ижмишнаан субут апIузра гьязур вуза!
Пуз ккундузуз, гьюкуматдира гъи дявдин гъуллугънаъ айидариз лазим вуйи кюмекар тувра. ТIалабарра улупура – увуз яшайишдин шартIарра яратмиш апIура. Тялукь аьгьвалатнаъ гьюкмиз аькси улхбар гъахру жигьиларин гъавриъ адарза, – гъапнийи ич сюгьбатнаъ дугъу.
Дупну ккундуки, Краснодарин 8 аэродромарикан ихь ватанагьлийин гюзчиваликк ккайи аэродром варитIан ужубси гьисаб дапIна. Дурар гьар вахт- на жюрбежюр метлеблу серенжемариъ иштирак шула. Хъа гьязурвалин ляхникан гъапиш, улупнайи месэлйир дурари гьар йигъандин гюзчиваликк уьрхюра.
Дугъан ляхин аьхиримжи йисари швнуб-саб ражари Москвайиан дуфнайи тялукь комиссияйин вакилари ахтармиш гъапIну ва саки гьар ражари заан кьимат тувбиинди лишанлу дапIна. Вафалуди гъуллугъ гъабхбаз лигну, капитан Альберт Ферзялиев Урусатдин Миноборонайин терефнаан «Дявдин гъуллугънаъ тафавутлу хьпаз лигну», «ВВС-дин 100 йис» медалариинди, гъуллугънан аьхюдарихьан швнуб-саб ражари аферин мялум апIбиинди лишанлу дапIна.
Узу зиихъ гъапиганси, Ватандиз даимлугъ кьягьял табасаран жигьилар гьамусяаьт Урусатдин кьушмарин жергйириъ хайлиндар лихура. Дурарикан гьарсари чпин ватандаш’валин буржи намуслувалиинди тамам апIура. Дурариз гележегдиъра хъуркьувалар ккун апIури, узуз ихь вари кьягьялар Ватан уьбхрурин Йигъахъди тебрик апIуз ккундузуз. Гъит, уьлкейиъ ислягьвал ибшри!
