19-пи ноябри Дербентдиъ му шагьрин мастер-план дюзмиш апIбаан Вари халкьарин ачухъ вуйи конкурсдин натижйир гъивнийи. Жюрийин улихьна шубуб консорциумдин вакилари чпин ляхнар адагънийи. Гьарсаб мастер-план жюрбежюр уьлкйирин вакилар иштирак духьну, шубуб тешкилатдин – INDArchitects архитектурайин бюройин, Москва шагьрин Генпландин Институтдин ва «ЦIийи жил» кIуру консорциумдин – регьберваликкди дюзмиш гъапIдар вуйи.

Конкурсдиъ «ЦIийи жил» кIуру консорциумдин регьберваликкди юкьуб уьлкейин командйири – GroupeHuit (Франция), MaeArchitects (Великобритания), West 8 (Нидерланды) и НИУ ВШЭ (Урусат Федерация) яратмиш дапIнайи план гъалиб гъабхьнийи.

Гъалиб гъабхьи командайи чпин проект «Дербент культурйирин ва деврарин кьюркь» концепцияйиин биналамиш гъапIну. Дидин бинайиз битав саягъниинди ва гизаф кьадарнаъди инсанар яшамиш шулайи шагьрин лишнар гъадагъну. Проектди инфраструктурайихъди тямин дапIнайи шагьрин районарин аьтрафар артмиш апIувалин теклифар дивра – диди шагьрин агьалйириз чарасуз лазим вуйи йишварихьна рягьятди гъягъюз мумкинвал туври, транспортдин цирклиз айи гъагъ пучIу апIиди.

Гъалибчи проект яратмиш гъапIдарин фикриинди Дербент хъана чру шагьур дубхьну ккунду. Гьарар-кюлерин чрушну ккаънайи уткан кючйири шагьрин вари районар сатIи апIиди. Шагьрин гъирагъариъ агьалйирин кюмекниинди арайиз гъабхи «Чру чIули» экологияйин аьгьвалат къайдайиз хибди, къайдасузди хулар тикмиш апIувал яваш апIиди.