Ноябрин вазлин аьхиримжи элгьет йигъ ихь уьлкейиъ дадайин Йигъси къайд апIуру. Му йигъахъди аьлакьалу вуди гъахру серенжемарин дахилнаъди Хив райондин Ляхла гъулаъра шадлугънан мажлис кIули гъубшнийи.

 

Гъулан библиотекайин заведующий Раман Къурбановдин ва культурайин Хулан художествойин руководитель Аьбдулгъани Ражабовдин кюмекниинди му мярака тешкил гъапIур Ляхлаарин культурайин Хулан директор Фирудин Маллаев вуйи.

Уч духьнайи 25 дишагьли – Игит бабар, зегьметнан ветеранар, яшлу дишагьлийир ва вари дадйир дадайин Йигъахъди тебрик апIуз серенжемдиз «Сельсовет Ляхлинский» СП-йин глава Шамил Гьяжимурадовра гъафнийи.

Чан улхбаъ гъулан поселениейин главайи уч духьнайи дишагьлийир дадайин Йигъахъди тебрик гъапIнийи ва дишагьлийири, дадйири уьмриъ уйнамиш апIурайи аьхю ролиз чухсагъул мялум гъапIнийи.

Дадйир му машкврихьди тебрик апIури, Фирудин Маллаевди гьамци гъапнийи:

«Дада! Баб! Му багьалу гафар гъеерхьиган, гьарурин кIваз лап рягьят шулу. Ихь Мягьямед пайгъамбри (с.аь.в.) гъапиганси, веледариз вуйи женнет дадайин ликарикк кка. Ухьу дадайихъ фукьан зегьмет гъизигишра, дугъаз гъилигишра, ухьхьан дугъу ухьухъ гъизигу зегьметнан бурж кьяляхъ апIуз хьибдар, ухь’ан удукьидар».

Серенжемдин асас пай аьхирихъна гъюбан кьяляхъ, уч духьнайи дишагьлийири чпиз гьязур дапIнайи «меъли столихъ» деъну, чпин уьмрикан, чпиз алахьу читинваларикан ктибтури, сюгьбат гъубхнийи.

Мярака Гюльмира Маллаевайи дадайиз бахш дапIнайи мяълйир апIбиинди ккудубкIнийи.