3-пи декабрь вари халкьарин бедендик шикаствал кайи инсанарарин Йигъси къайид апIура.
Му йигъаз тялукь вуйи серенжемар Дербент шагьрин бедендик шикаствал кайи бицIидариз вуйи 7-пи нумрайин интернат-мектебдиъра кIули гъушнийи. БицIидариз бахш дапIнайи думу машквар сяаьт 12-диъ ккебгънийи. Теклиф дапIнайи хялар серенжемдиз уч хьайиз, интернатдиъ дивнайи столар жюрбежюр итIру сурсатарихъди, меълишнарихъди дабалгнайи. Уч духьнайи хялар му машквриин гизаф шадди вуйи.
Му мяракайиъ РД-йин Халкьдин Собраниейин депутатар Велиюллагь Фаталиев и Полад Наметуллаевра иштирак гъахьний. Дурари чпин улхбариъ, машквар мубарак апIури, вари уч духьнайидар бицIидарин йигъахъди тебрик гъапIний, йигъну архаинвал, йишвну нивкI адарди, бизарвал аьгъдарди, кIваъ аьхю жумартвал, инсавал, язухъ’вал ади майиф бицIидариз лигурайидариз аьхю чухсагъул мялум гъапIний. Гележегдиъ дурариз ва дурарин бицIидариз жандин сагъ’вал, ярхи уьмур ва аьхю сабур ккун гъапIнийи.
Му мярака тешкил апIбаъ спонсорвалин кюмек гъапIдарра ктудухди гъитуз шулдар. Рягьимлувалин кюмек тувдарин арайиъ гьаргандин спонсорар агентство «Апельсин» – «Смешарики» ва, гьадрарихъди сабси, варидарин гьюрмат айи ва вари инвалидариз ва абйир-бабар адру бицIидариз таниш вуйи кас, мицисдар мяракйирин кIакIначи, ихь мерд ватанагьли Айваз Рамазанов айи.
Ургубпи нумарайин интернатдин директор Лала Мамедовайи майиф бицIидариз тешкил дапIнайи мяракайик пай кивдариз аьхю чухсагъул мялум гъапIний.
Серенжем ккебгъну ккудубкIайизкьан театрин аьртистари уччвудар мяълийир гъапIний, маракьлу сягьнйир улупнийи, хъа цирк-нан артистари чпин удукьувалар улупнийи. Сумчриъ айиганси, мукьмар йивури, мяълийир апIури, циркнан артистари чпин устадвал улупури, шадвал ашра, саспи бицIидариз чпин жандиъ айи аьзабнахьан думу рябкъюрадайи я ебхьурира адайи. Дициб читинвалиъ айи бицIидар, дурарихъди гьарган гъайгъушнаъ айи абйир-бабар гъяркъиган, жвуван кIвазра аьзият, язухъ дархьиди гъубзурдайи. Серенжем ккудубкIайиз душваъ деъну гъузуз дархьиди, гъудужвну гъушдарра гъахьнийи. Му мяракайиъ Дербент шагьрин хайилин мектебара иштирак гъахьний. Дурарин арайиъ 3-пи, 9-пи, 11-пи, 12-пи, 13-пи, 15-пи, 17-пи нумр-йирин мектебар, 17-пи ва 18-пи нумрйирин прогимназйир айи, хъа Дербент шагьрин педагогвалин колледжди мицдар серенжемариъ гьарй исан иштирак’вал апIура.
