Гьябиб Сулейманов тикилишчивалин «Петербургстрой» ООО аьхю компанияйин хатIасузвал уьбхру гъуллугънан начальник ву. Дурарин тешкилатди Санкт-Петербург шагьриъ ва багахь районариъ гизаф мертебйирин аьхю хулар тикмиш апIура.
Гьябиб Салиховичдин ляхнин асас вазифйир финансарин месэлйир гьял апIбахъди, компания хатIалу гьяракатарихьан, конкурентарин рейдарихьан уьбхбахъди, компанияйин муштарйирин месэлйир гьял апIру рякъяр агбахъди, гъуллугъчйириз маважиб тутрувру дюшюшар арайиз гъюз гъидритбахъди ва компанияйин жара месэлйирихъди аьлакьалу ву.
Гьябибдин абйир-бабар гьадму саб вахтна Табасаран райондин Хючна гъул’ан Ставрополь крайин Буденновск шагьриз кючмиш гъахьну. Дугъан адаш хайлин йисари совхозариъ, колхозариъ гъилихну, хъа дада Шимья инглис ва немец чIалар кивру мялим вуйи. Дугъура чан вари уьмур мектебдиъ баяр-шубариз харижи чIалар улупбаз бахш гъапIну.
Гьябиб, Буденновскдиъ 15-пи нумрайин мектеб ккудубкIну, Санкт-Петербургдин милицияйин кьялан пишекарвалин мектебдик урхуз кучIвру ва, думу ккудубкIбан кьяляхъ, направлениейиинди гьадму шагьриъ полицияйин участокдин полицейскийди ляхниъ дийигъуру. Ляхниъ ужудар натижйир улупбаз лигну, цIиб вахтналан жигьил пишекар Санкт-Петербургдин уголовный тахсиркарвалар ачмиш апIбан гъуллугъназ лихуз гъадагъуру. Амма жигьил полицейскийиз, ляхниъ хъуркьувалар гъадагъурашра, му пишекарвалиъ чан гележег рябкъюри адайи. Хизанарихъди мясляаьт дапIну, 2013-пи йисан думу тикилишчивалин корпорацияйиъ лихуз хъюгъру.
«Гьамусяаьт узу лихурайи тикилишчивалин компания аьхюб ву. ИкибаштIан, читинваларра адарди шулдар. Ляхин кьабулди вуш, фунуб вушра месэла гьял апIуз рягьятди шулу. Узу йиз ляхнин начальник вуза, гьаддиз зегьметнан график тартиб дапIну, думу гьял апIуз узура чалишмиш шулаза, жарадариканра тIалаб апIураза. Гьаци дарш, деврин конкуренцияйин рынокдиъ жарадари жвуван компания улихь гъябгъюз гъитудар»,
– кIура ич сюгьбатнаъ Гьябибди.
Гьябибдиз ва дугъан уьмрин юлдаш Зарифатдиз шубур велед а. Дугъу чан хизанарикан, чан ляхникан, гележегдин планарикан дамагълувалиинди ктибтнийи. Гележегдиъ дугъаз учв дилаварчи кас вуди рякъюра. Хъа гьаму девриъ дилаварчивалигъ гъяйидаризра рягьятди даруваликанра Гьябибдиз хабар а. Жвуван ватандикан дугъу хайлин мани гафар гъапнийи.
«Узу Дагъустандиз йисан кьюб ражари гъягъюри шулза. Хючнаъ ич адашдин чи яшамиш шула. Думу фунуб вахтнара хялар кьабул апIуз ккунир, майил-мадатдихъан юкIв убгрур, гьаммишан шадур ву. Хъа дицир касдихьна хялижвди гъягъюз ккун шулу. Ихь табасаранлуйириз чпин кIван мурадарихъ хъуркьувал, наан ашра багъри ватан гьадрархувал, улихь дивнайи месэла гьял апIувал, сабдихьанра гучI дарди, хилар хъиржвну, зегьмет зигувал ккун апIураза. Узу гьаму шагьриз гъафи сабпи йисари ич аьхю адаш, полицияйин полковник Сейбуллагь Сулеймановди гизаф кюмекар гъапIнийзуз. Дугъаз ва узуз кюмек туврайи, йиз гаф гьисабназ гъадабгъурайи вари юлдшариз чухсагъул пуз ккундузуз», – гъапнийи Гьябибди.
«Гьябиб Сулеймановди Санкт-Петербургдиъ айи дагъустанлуйирихъди мани аьлакьйир уьрхюра. Думу дагъустандин землячествойи тешкил апIру гьарсаб серенжемдиъ иштирак шулу. Гьябиб «Петербургстрой» компанияйин кIулиъ айидари важиблу вакил, психолог, пишекарси гьисаб апIура. Дугъу, инсандин суратназ дилигну, дугъан хасиятнакан, гъиллигъарикан ачухъди кIури шулу. Гьаму девриъ ихтибарвал апIуз шлу касар дустарин арайиъра гьеле-меле алахъудар. Хъа Гьябиб ихтибарлу, дустар, хизан, ватан бадали чан жан тувуз гьязур вуйи баярикан сар ву. Гьябибди чахьна илтIикIу вари касариз кюмекнан хил гьачIабккуру. Гьамусяаьт учу сатIиди саб проектдиин лихурача. Дугъахъди лихуз рягьятди ву», – къайд гъапIнийи, чпин кIваъ айи фикрар ачухъ апIури, Гьябибдин дустари.
