Дилаварчивал артмиш апIбан бадали, аьхиримжи вахтна ихь республикайиъ му цирклиз гизаф фикир тувра. Йигълан-йигъаз дилаварчйири чпин ляхнин сабпи гамар фици алдагъуруш, фицдар гъалатIар дапIну ккундарш, мялуматарин кюмек тувру жюрбежюр тешкилатар, центрар арайиз гъюра. Гьадрарин арайиъ «Дилаварчйирин фабрика» проект, дилаварчйириз кюмек апIру Центр ва жара идарйир а.
Улихьна йигъари «Дилаварчйирин фабрика» проектдин кIулиъ айи Мягьямед Курбайтаев, дилаварчйириз кюмек апIру Центрин вакил Юсуп ТIагьиров, дилаварч-йиринна инвестицйирин Агентствойин кIулиъ айирин заместитель Гьяжи-Мурад Абашилов журналистарихъди гюрюшмиш гъахьну.
Серенжемдин эвелиъ хялари «Дилаварчивал яркьуди тарабгъувал» федералин проект ихь республикайиъ фици уьмриз кечирмиш апIураш ктибтнийи.
«Федералин проект ухьухь уьмриз кечирмиш апIувал метлеб вуди, гьаму йисан республикайиъ дилаварчивалихъ тазади хъюгърайидариз ва цирклиъ ляхин апIурайидариз хайлин серенжемар тешкил дапIна.
Ич агентствойи «Дилаварчйирин фабрикайихъди», «Синергия» проект-дихъди сатIиди ляхин апIури, ужудар натижйир хьпан бадали, жюрбежюр ляхнар кIули гъахура. Гьамцдар ляхнар кIули гъахруган асас роль уйнамиш апIурайиб республикайин дилаварчйириз кюмек туврайи Центр ву»,
– гъапнийи Гьяжи-Мурад Абашиловди.
Чан улхбаъ «Дилаварчйирин фабрика» проектдин кIулиъ айи Мягьямед Курбайтаевди мялум гъапIганси, республикайиъ проектдин дахилнаъди 3 программа: «Фабрика – БицIидар», «Фабрика – Старт» ва «Фабрика ПРО» уьмриз кечирмиш апIура.
«Фабрика – БицIидар» программайин дахилнаъди декабрин 3-диан 19-дизкьан мектебариъ урхурайидариз ва бицIи курсарин студентариз дилаварчивалиан вуйи олимпиада кIули гъябгъюра. Думу 2 этапдиъди 14 йислан 17 йис’ина яшар айи мектебариъ урхурайидарин ва студентарин арайиъ кIули гъябгъюрайиб ву. Хъа 29-пи декабриъ 100 гъалибчи гъядягъиди. Думу гъалибчйир яшнан 2 дестейиан: 14-15 йис ва 16-17 йис дубхьнайи иштиракчйирин арайиан гъядягъиди. Хъасин дурар вари 25-пи декабриъ гъябгъру финалиъ иштирак хьиди ва дурариз багьалу пешкешар тувди», – гъапнийи проектдин кIулиъ айири.
Чан улхуб давам апIури, М.Курбайтаевди гъапиганси, тазади дилаварчивалин ляхин ккебгъуз ккунидариз «Фабрика – Старт» кIуру курс ачмиш дапIна. Гъийин йигъаз душваъ 500-тIан артухъ касари дилаварчивалиан аьгъювалар гъадагъура.
Серенжем давам апIури, Юсуп ТIагьировди къайд гъапIганси, республикайн милли проектарин дахилнаъди улупнайи ляхин плантIан 9 процентдин артухъди тамам дапIна. Яна «Дилаварчивал яркьуди тарабгъувал» федералин программа уьмриз кечирмиш апIури, йисандин аьхириз программайин дахилнаъди му цирклиз 9,5 агъзур инсан жалб апIиди. Юсуп ТIагьировди туву мялуматариинди, улупнайи кьадарнакан 1727 касди дилаварчивалин цирклиан хайлин аьгъювалар гъадагъну, хъа 170 касди чпин хусуси бизнес абццну.
