Аьхиримжи вахтна республикайиъ ужудар рякъяр, уччвудар гьяятар тикмиш апIбан ва агьалйир марцци штухъди тямин апIбан бадали, хайлин зегьмет зигура. Му вари ляхнар республикайин Глава Владимир Васильевдин жягьтлувалиинди кIули гъахурайидар ву. Гъи узуз «Йиз Дагъустан – шагьринсдар гъулай шартIарин йишв» проектдикан ва проектдин дахилнаъди апIурайи ляхникан жикъиди ктибтуз ккундузуз.
Улихьна йигъари узу думу проектдин ляхнар албагурайи Рукьият Аьгьмедовайихъди гюрюшмиш гъахьунза ва сюгьбат гъубхунза. Дугъан гафариинди, гьаму йисандин аьхириз «Йиз Дагъустан – шагьринсдар гъулай шартIарин йишв» проектдин дахилнаъди республикайиъ 228 жямяаьтлугъ йишвар ккабалгиди. Гьадрарин арайиъ 10 шагьрин 14 дараматарихъ хъайи гьяятар ва 214 жямяаьт уч шлу йишвар, ва гьацира 29 муниципалитетдин 58 гъул проектдиъ иштирак шула.
«Республикайин бюджетдиан жара дапIнайи дакьатарилан гъайри, районарин бюджетарианра кюмек апIбаз лигну, учуз 35 миллион манатдихьнакьан дакьатар кьяняаьт апIру мумкинвал гъабхьну. Думу пулихъ жямяаьт уч шлу 7-сан йишв ккабалгунча.
Гъийин йигъаз 68 объектариин ляхнар аьхирихъна дуфна. Ццийин йисаз улупнайи пландикан 60,7% ляхнар дапIну ккудукIна», – къайд гъапIнийи Рукьият Агьмедовайи.
Табасаран, Хив районариъ ва Дагъустандин Огни шагьриъ проектдин дахилнаъди кIули гъахурайи ляхнарикан гьерхиган, дугъу узуз гьамциб жаваб тувнийи: «Сабпи нубатнаъди узуз кьюбиб районарра цIийи главйир ктагъбахъди тебрик апIуз ккундузуз. Цци Табасаран район республикайиъ уьмриз кечирмиш апIурайи программйирикан 42 программайиъ иштирак шула. Гьадрарин арайиъ «Йиз Дагъустан – шагьринсдар гъулай шартIарин йишв» проектра а. Му проектдин дахилнаъди гъийин йигъаз ра-йондиъ 2 объект ачмиш дапIна (Сиртич ва Хюрикк). Сиртич гъулан объект апIруган, душваъ узура иштирак гъахьнийза. Рябкъру гьялариан, му гъулан агьалйир мидиз гизаф ккилигурайи. Узу гьадушвахь хьмиди, хайлин касар гъюри, узуз чухсагъул мялум апIури гъахьну, гьаци Хюрикк гъулаъра. Яна, пуз ккундузузки, гъулариъ инсанар гьамцдар дигиш’валариз гизаф ккилигура.
Хив райондиъра проектдин дахилнаъди Хиварин гъулаъ айи паркдиъ дигиш’валар гъягъюра.
Хъа Дагъустандин Огни шагьрикан кIуруш, душваъра сейир апIру паркар, гьарар кивнайи зулар уччву апIура. Гьаму йигъари душваъ, рас апIбан кьяляхъ, жямяаьтлугъ уч шлу 4 йишв ачмиш гъапIунча.
Проектдин дахилнаъди рас гъапIу сабсан объект – шагьрин культурайин хал ву. Улихьди думу фициб гьялнаъ айиш ва гьамус фици дигиш гъабхьнуш, узуз гъябкъюнзуз. Культурайин хулан гъвалахъ хъайи паркдиз шагьрин тмуну кIулиъ яшамиш шулайин инсанар рягьятвал йивуз гъюра», – къайд гъапIнийи Рукьият Аьгьмедовайи.
ИкибаштIан, йисандин аьхириз проектдиъ улупнайи вари ляхнар тамам апIиди. Рукьият Аьгьмедовайин гафариинди, варитIан уччву объект Буйнагъск шагьриъ ачмиш гъапIу фонтандин гъвалахъ хъайи бицIи багъ ву.
«Пуз ккундузузки, ухьу гьамусяаьт ихь республика уччву ва рягьятвал гъадабгъуз шлу республикайиз илтIибкIбан бадали, дурумлуди зегьмет зигурахьа. Фукьан вушра читинваларра алахьура.
Аьдати инсанарихьан рягьятвал йивуз шлу гьамцдар гъулай йишвар ачмиш апIурайивали, ужудар рякъяр тикмиш апIурайивали, агьалйирихьна марцци шид зигурайивали инсанарин ихь рес-публикайин гьюкмиин, улихь-кIулихь хьайи гъуллугъчйириин хъугъ’вал хьуз гъитра»,
− аьлава гъапIнийи проектдин кIулиъ айири.
#МойДагестан #проект
