Гьюрматлу ватанагьлийир, «Табасаран райондин жигьилар» ва «Хив райондин жигьилар» кIуру Дагъустандин региондин жямяаьтлугъ тешкилатари «Йиз багъри Табасаран чIал» кIуру конкурсдин 2-пи этап тешкил дапIна. Конкурс мартдин 7-диан апрелин 10-дизкьан давам хьибди.

Къайд апIуб лазим вуки, му конкурсдин 1-пи этап сач 20-пи октябриан 27-пи ноябризкьан давам гъабхьнийи.

Конкурсдин тешкилатчи, «Табасаран райондин жигьилар» ДРОО-йин председатель Муса Гьябибовдин гафариинди – му ражарин конкурс яшнан шубуб дестейин арайиъ кIули гъябгъиди: 3 йислан 6 йис’ина яшар духьнайидарин; 7 йислан 10 йис’ина яшар духьнайи бицIидарин; 11 йислан – 14 йис’ина яшар духьнайи живанарин.

«Гъубшу конкурсдиъси, гьаму ражарира, саб дакьикьайин арайиъ бабан чIалниинди шиир урхури видеоролик адабгъну, думу Whatsapp-дин 8-989-459-29-99 нумрайиз хъадапIну ккунду. Видеороликар ич вари социальный сетариъ ирчну, гъалиб гъабхьи видеоролик, дидиз инсанари диву лайкарин кьадарназ лигну, гъядябгъидича. Гьарсаб яшнан дестейиъ 3 гъалибчи хьиди (1-пи, 2-пи ва 3-пи йишв) ва гьаруриз кьиматлу пешкешарра тувди»,

– гъапнийи конкурсдин тешкилатчийи.

Му жюрейин конкурсар, йиз фикриан, кми-кмиди гъахури ккунду, фицики багъри чIалниинди шиир урхували, сочинение бикIували бицIидарин, асас вуди шагьрариъ яшамиш шулайидарин, бабан чIалнахьна вуйи маракьлувал артухъ хьуз гъибтру.

Талит саягъниинди гъахру серенжемари бицIидарин чIалнахьна вуйи иштагь артухъ апIуру, дурарик аьгъюваларихьна вуйи гьевес капIру. Гъи шагьрариъ яшамиш шулайи баяр-шубариз бабан чIал лап зяифдитIан аьгъдруган, анжагъ гьаму жюрейииндитIан дурар чIал дубгъувалиина жалб апIуз хьибдар. Гьаддиз му жюрейин конкурсар шлубкьан артухъ тешкил апIуб лазим ву.

 

Тема давам апIури:

«Йиз багъри Табасаран чIал» конкурс гъябгъюра

«Йиз багъри табасаран чIал» конкурс аьхирихъна гъафну

Багарихьди конкурс хьибди