Февраль вазлин 21-пи йигъ Варихалкьарин бабан чIаларин йигъси къайд апIури, хайлин йисар ву. Бабан чIалну халкьдин хасият, фагьум, меденият уьрхбаъ аьхю роль уйнамиш апIура. Бабан чIаларин йигъ къайд апIувал – чIал артмиш хьпаз кюмек тувру, чIалнан багьалувал артухъ апIру ляхин ву.
Ккудубшу йисан, бабан чIаларихьна вуйи янашмиш`вал чIюбгъюз ккунди, къанундиъ дигиш`валар тIауз ккунидар ачмиш гъахьнийи. Дурариз мектебариъ бабан чIалар кивувалин къайда мажбури дережайиан факультатив дережайиз адабгъуз ккун гъабхьнийи, гьациб кьанундин проектра дюзмиш гъапIнийи. Мектебарин мялимар, бабан чIаларихъди алакьа айи идарйирин гъуллугъчйир, аьлимар, журналистар, писателар, шаирар, республикайин жюрбежюр жара идарйирин гъуллугъчйир думу ляхниз аьксиди удучIвнийи.
Халкьдин дуланажагъдихъди, зегьметнахъди, тамам апIурайи ляхнарихъди сигъ аьлакьа ади артмиш шулайи чIал халкьдин багьалу хазнйирикан саб ву. Ухьу ихь бабан чIалар уьрхюз ва артмиш апIуз буржлу вухьа. Му буржи гьисс апIру мялимарин кьадар табасаран райондиъ аьхюб ву. Гьаддиз райондин саки вари мектебарин мялимари бабан чIаларин йигъаз тялукь вуйи серенжемар кми-кмиди кIули гъахуру. Хюрккарин кьялан мектебдин мялимарра гьадму жергейиан ву. Бабан чIаларихъди аьлакьалу серенжемар дурари чпин мектебдиъра тешкил апIуру, ва райондиъ кIули гъягъру тялукь серенжемариъра баяр-шубар иштирак хьуз гъитру. Мисалназ, гъябгъюрайи йисан январь вазлин 18-пи йигъан райондиъ кIули гъубшу табасаран шаирарин шиърар ужуди урхбан конкурсдиъ Н.Н. Аьлигаева 3-пи йишван сагьиб гъахьну, хъа гьадму вазлин 30-пи йигъан табасаран литературайиан кIули гъубшу олимпиадайиъ дугъу 2-пи йишв гъадабгъну. Дугъаз дарс киврайи мялим Р. Байрамбегова ву.
Бабан чIаларин йигъаз бахш вуди, февралин 21-пи йигъан Гюльсенем Къурбановайи 7-пи «а», 7-пи «б», 7-пи «в» классариъ табасаран шаирарин шиърар ужуди урхбаан конкурс тешкил гъапнийи. Конкурсдин сабпи пайнаъ табасаран шаирарин эсерар гъурхнийи ва сабпи йишваз 7-пи «в» классдиъ урхурайи ФатIимат Исрафилова, 2-пи йишваз Селимат Аьлиева, 3-пи йишваз Муминат Гьясанова лайикьлу гъахьнийи.
Конкурсдин кьюбпи пайнаъ табасаран шаирарин гафариз гъидикIу мяълийир тамам дапIну ккундийи. Мушваъ 1-пи йишв 7-пи «а» классдиъ урхурайи Мадина Мягьямедовайи, 2-пи йишв 7-пи «в» классдиъ урхурайи Заира Аьбдулселимовайи. 3-пи йишв 7-пи «в» классдиъ урхурайи Уьмар Мягьямедовди ва Сумая Аьлигаевайи гъадагънийи.
Шубубпи конкурс абйирин гафариз ва мисалариз бахш дапIнайиб вуйи. Му конкурсдиъ 1-пи йишв ФатIимат Исрафиловайиз, 2-пи йишв Мадина Мягьямедовайиз, 3-пи йишв Уьмар Мягьямедовдиз гъахьну.
Гьадму йигъан 8-пи «в» классдиъра Рабият Байрамбеговайи тешкил гъапIу, «Йиз багъри бабан чIал» ччвур тувнайи серенжем кIули гъубшну. Серенжемдиъ «Луфар» ва «Ппазйир» кIуру командйирин арайиъ талитар кIули гъушну. Капитанарин арайиъ айтйир ва абйирин мисалар пувалин, табасаран писателарин, шаирарин, драматургарин ччвурар ктухбан, табасаран писателарикан суалар кайи кроссворд абцIбан табшуругъар, табасаран шаирарин эсерар ужуди урхбан конкурс айи. Шиърар урхбан талитнаъ Наиля Аьлигаева 1-пи йишваз, Магьият Шябанова – 2-пи йишваз, Аминат Ханбабаева – 3-пи йишваз лайикь гъахьнийи. Конкурсдиъ уьмуми гьисаб 26:25 дубхьну «Ппазйир» команда гъалиб гъахьнийи.
Кьюбби серенжемарра гьязур-лугъ’валин ужуб дережа ади кIули гъушну. Мицдар маракьлу серенжемари урхурайидарин бабан чIалнахьна вуйи ккунивал артухъ апIуру.
21-пи февралиъ кIули гъуху серенжемариъ иштирак гъахи баяр-шубар чпин мялимарихъди.
