Гъубшу йисан декабрь вазлин аьхириъ, 2018-2022-пи йисариз вуйи проектдиз асас вуди, Дагъустандин Огни шагьриъ Культурайин парк ва гьацира Валерий Чкаловдин ччвурнахъ хъайи кючейиъ айи гизаф мертебйирин хуларин гьяятар рас гъапIнийи. Му жямяаьтлугъ йишвар шагьрин агьалйири сесер тувувалиинди рас апIуз гъядягънийи.

Ццийин йисанра шагьриъ му проектдихъди вуйи ляхин давам апIури, расвалин ляхнар тамам дапIну ккуни жямяаьтлугъ йишвар гъядягъбан бадали, февралин 25-пи йигъан 2-пи нумрайин мектебдиъ агьалйири сесер тувру сечкйирин участок тешкил гъапIну.

Му йигъан сес тувбан бадали, сиягьдик 9 жямяаьтлугъ йишвар каъну: 1. Калининдин ччвурнахъ хъайи проспект, 2. Шагьрин стадион, 3. Гъалибвалин парк, 4. Гъалибвалин сквер, 5. Культурайин Хулан парк, 6. Пушкиндин ччвурнахъ хъайи кюче, 7. Лениндин ччвурнахъ хъайи кюче, 8. Сталиндин ччвурнахъ хъайи проспект, 9. Козленкойин ччвурнахъ хъайи кюче.
Шагьрин сечкйирин комиссияйи 6254 бюллетень гьязур гъапIнийи.

Февралин 26-пи йигъан агьалйири туву сесериинди, рас дапIну ккуни жямяаьтлугъ йишварик гьамрар кахьну: Калининдин ччвурнахъ хъайи проспект, Гъалибвалин парк ва Культурайин Хулан парк.