Ватандин Аьхю дявдиъ гъалибвал гъадабгъну 75 йис тамам хьпаз бахш вуди, гьаму 2020-пи йис кIваин уьрхбан ва машгьурвалин Йисси мялум дапIна. Гьаддихъди аьлакьалу вуди, Табасаран райондиъ гизаф игьтияжар гьуркIру жигьиларин центри Гъалибвалин Йигъ улубкьайиз имбу йигъар ктухбан календарь гъабхуз хъюгъна.
Центрин директор Рамис Рамазановди къайд гъапIганси, проектди аргъаж шулайи наслариз, фашистарин алжагъуваларихьан Ватан дюбхну, Аьхю Гъалибвал гъадабгъу халкьдин игитвалин тарихнахъан, машгьурвалихъан дамагъ апIуз улупуру. Проект Гъалибвалин Йигъ улубкьайиз 75 йигъ ккимиди кьувватнаъ убчIвну. 1945-пи йисан февралин вазлилан майдин вазлизкьан Ватандин Аьхю дявдин асас гьядисйирикан мялуматар туври, календари 2020-пи йисан 9-пи Майизкьан йигъар ктухиди.
Проект ачмиш апIувал Табасаран райондин Халагъ гъулаъ яшамиш шулайи Ватандин Аьхю дявдин иштиракчи Гьясан Ражабович Ражабовдиз табшурмиш гъапIну.
Гьясан Ражабов 1942-пи йисан фронтдиз гъушну. Кафари Кавказ бадали гъахьи дявдин женгариъ гъагъи зийнар духьну, гьацI йисан Тбилиси шагьрин госпиталиъ дахъну. Духтрари дявдиъ иштирак хьуз удудукьруси гьисаб дапIну, думу багъри гъулаз кьяляхъ гъафну.
Гьясан Ражабовди дявдин кьяляхъ йисари зегьметнан баркаллу рякъ ккадапIну: багъри колхоздин бухгалтерди, гъулан советдин секретарди гъилихну, хъа гизаф йисари Халгъарин халачйирин машгьур фабрикайин директорди лихури гъахьну. Гьамусяаьт думу Халагъ гъулаъ бицIину балин хизандихъди яшамиш шула.
Ватандин Аьхю дявдин иштиракчийин кIван мурад-метлеб – Гъалибвалин 75-пи юбилейин Параддин йигъ улубкьайиз сагъ-саламатди гъузувал ву.
