Сабпи мартдиъ Табасаран райондин Хючна гъулаъ Кьалухъ Мирзайин ччвурнахъ хъайи спорткомплексдиъ, Ватандин Аьхю дявдиъ гъалибвал гъадабгъну 75-йис хьпаз тялукь вуди, живанарин арайиъ грэпплингдиан турнир кIули гъубшну. Дидиъ Мягьячгъала, Избербаш, Дербент, Дагъ. Огни, Дербент шагьрариан, Мягьярямкент ва Табасаран районариан командйирин дахилнаъди 7 йислан 15 йис’инакьан яшариъ айи 160 спортсмен иштирак гъахьну.
Му турнир Табасаран райондин администрацияйин кюмекниинди ва 2-пи нумрайин ДЮСШ кIулиъ ади тешкил гъапIуб вуйи. Судйирин коллектив Мягьячгъала шагьриан дуфнайи.
Узу душваз дуфнайи багьалу хяларихъдира гюрюшмиш гъахьнийза. Гьадрарикан сар джиу-джитсуйиан юкьуб ражари дюн’яйин чемпион Мугьяммад Аьбдулкьадиров вуйи, дугъаз спортдин му жюрейиан кIару чIулра а. Гьамусяаьт дугъу Мягьячгъала шагьриъ бицIидарихъди ляхин апIура. Дугъу вердиш’валар туврайи бицIи спортсменари аьхю хъуркьувалар гъазанмиш дапIна – дурар дюн’яйин ва европайин чемпионар духьна. Мугьяммад Аьбдулкьадировди Табасаран райондин жигьилариз грэпплинг артмиш апIбаъ аьхю хъуркьувалар ккун гъапIнийи, ва бицIи вахтнан арайиъ Табасарандиъра бицIи чемпионар шул кIури, чан миж кайиваликан ва учв ккуни вахтна кюмекназ гъюз гьязур вуйиваликан гъапнийи.
Табасаран райондин спортдиз аьхю хъуркьувалар Дербент шагьриан вуйи джиу-джитсуйиан шубуб ражари дюн’яйин чемпион ва кIару чIулин сагьиб, Дербентдиъ «Универсал файтер» кIуру клубдин тренерди лихурайи Мурад Нурудиновдира ккун гъапIнийи. Дугъу Табасаран райондиъ спорт артмиш апIбаз ужуб фикир туврайивалра къайд гъапIнийи.
Табасаран райондин 2-пи нумрайин ДЮСШ-дин тренер Тимур Къурбановди, талитар ккергъайиз, райондиз грэпплинг фици гъафнуш ва бицIи вахтнан арайиъ ерли спортсменари гъазанмиш гъапIу хъуркьуваларикан ктибтнийи. Дугъу живанариз аьхю хъуркьувалар ккун гъапIнийи ва спортдиз аьхю фикир туврайивализ райондин руководствойиз чухсагъул гъапнийи.
Талитарин натижайиъ 1-пи йишван сагьиб Дагъ. Огни шагьрин командайи гъабхьнийи, 2-пи йишв Табасаран райондин 2-пи нумрайин ДЮСШ-дин командайи, хъа 3-пи йишв Избербащдин командайи гъазанмиш гъапIнийи.
Гъалиб гъахьи командйир кубкйирихъди, медаларихъди ва багьалу пешкешарихъди лишанлу гъапIну. Табасаран райондин глава Мягьямед Къурбановди турнириъ гъалиб гъахьи живанар гъалибвалихъди мубарак гъапIнийи..
«Ихь жигьилари аьхю хъуркьувалар улупбиин узу гизаф рази вуза. Ухьу аргъаж шулайи насил аьхю спортдихьна духну ккунду. Гьар йисан райондиъ волейболиан, пучIу атлетикайиан, футболиан ва спортдин кчIихбариан талитар кIули гъягъюри шулу. Дидлан савайи, райондиъ спортдин инфраструктурара улихь гъябгъюра: гъулариъ спортдин майднар тикмиш апIура, гъийин йигъаз тялукь вуйи воркаут-майднар дивра. Учвуз спортдиъ аьхю хъуркьувалар ишри», — къайд гъапIну дугъу.
Мягьямед Къурбановди турнирин аьхириъ дюн’яйин чемпионар Назим Абасов, Мугьяммад Аьбдулкьадиров ва Мурад Нурудинов чан ччвурнахъ вуйи сяътарихъди лишанлу гъапIнийи.
