Дадавалин буржи – му Первердигар Аллагьди дишагьлийиина аманат дапIнайи жавабдар ва гизаф читин месэла ву. Дишагьлийи думу месэла лайикьлуди тамам апIбаан Аллагьдинна жямяаьтлугъдин улихь жавабдарвал гъабхуру.
КIваантIан веледар ккуни дада – уьмрин ва хизандин ужубсиб пай ву. Веледдин бахтлу бицIивал ва хизандин хушбахтвал, уьмриъ шлу вари уж’валар гизафна-гизафси дадайикан асиллу шулу. Бахтлу хизандиъ чаз ккунивал ади аьхю гъахьи дишагьлийи чан веледаризра гьациб ккунивал тувди – ужуб манишин тувру хпир ва хъайивал апIуз аьгъю дада хьиди.
Ккуни веледар, хизан бадали сабурлу, тербия тувбан ляхниъ читинвалар кIулиз адагъуз гьязур вуйи, бицIидариз ужур дада, жилириз ужур хпир ва уьмрин гьякьлу юлдаш хьуз варидарихьан шулдар. Зиихъ ктуху хасиятар кайи дишагьлийихъди яшамиш хьуз бицIидаризра, жилиризра хушди, мюгькамди шулу, дицир касдихъди уьмрин читин жилгъйириан кIул адабгъуз, дюз рякъ ктабгъуз рягьятди шулу. Къайд апIувал лазим вуки, веледарира дада инжик апIуру, гьарган кIваъ айиб кIулиз адабгъуз гъитудар. Думуган дадайиз сес за апIбаккра ккубкьру. Хъа вушра, даърахди адау йи-швариз дилигди, инжик духьнайивал улулупди, дадайи сабурлуди чан вазифйир тамам апIувал лазим шулу.
Бахтлу ужуб хизандиъ веледарра тербия хъайидар, чпин багахь хьайи инсанариз гьюрмат айидар, чIуру хасиятар ктрудар вуди аьхю хьиди. Гизаф девлет айивал – му ужуб хизандин натижа дар. Эгер дадайинна адашдин аьлакьйир ужудар дарш, девлетну кюмек апIидар, веледарира чпиз туврайи тербия гъадабгъидар дурариз чпин улихь жара чешне рябкъюра. БицIирихьди чаз ккуниб вари тамам апIуз гъитувал – му ужуб дару тербия туврайивалин лишан ву. БицIириз лап ухди фу ужуб вуш, хъа фу харжиб вуш жара апIуз улупну ккунду. БицIириз «варитIан ужур», «варитIан фикирлур» ва гьацдар гафар апIували, эгер думу дугъриданра гьацир дарш, жара инсанар гьясбикк ккадрувалихъна хуру. Велед гьякьлур ва дугъри кас хьувалихъ хъергувал лазим ву. БицIир тербияламиш апIуз рягьятди вуйивал, хъа ужуб дару тербия хъайи бицIир цIийикIултIан тербияламиш апIувал лап читин месэла вуйивал варидариз аьгъя.
Сабурлу, фикирлу, ккуни вуйи дадайин багахь варидариз рягьятди шулу, дугъан багахь жара бицIиризра кмиди йишв бихъуру. Фукьан читин месэла алабхъишра – мектебдиъ мялимарихъди вушра, юлдшарин арайиъ вушра, гиран дубхьнашра, иццру духьнашра – дадайи вари дюз апIуру. Дугъу гьацира бицIир гьарсабдин гъаврикк ккаъру. Дадайи чан ккунивал вари бицIидариз гьубкIуз гъитру, чан кIван ва хиларин манишин кьабул апIрудариз тувбахъ, гьарган лайикьлу насил тербияламиш апIбан гъаразнаъ шулу.
Гьюрматлу дишагьлийир! Гьаму гъюрайи дишагьлийирин машквар тебрик апIури, «Табасарандин нурар» газатдин редакцияйин коллективди учвуз жандин мюгькам сагъвал, кIван шадвал, бахтлу уьмур ккун апIура. Гъит ихь гьарсар дишагьлийиз дадавалин шадвал рябкъри, гьарсар дадайин веледар бахтлу ишри, хъа гьарсар веледдин гъвалахъ чан кIван манивал тувуз шлу дадара ишри!
