Сагъламвал уьбхбан вари дюн’яйин тешкилатдин Генеральный директор Тедрос Гебреисусди SARS-CoV-2 (коронавирус) тарабгъувал тIягъюн абхъувалси мялум апIурайиваликан гъапну. «Коронавирус гьяракатниинди тарабгъурайивали учу дериндиан мюгьтал дапIна», – къайд гъапIну дугъу.
Гьелбетда, уьзрихъди женг гъабхура, хъа гьеле дидиз аькси дарман дибихънадар. Гьамусяаьт лап гъагъи аьгьвалат Италияйиъ ва Ирандиъ арайиз дуфна, хъа жара уьлк-йириъра уьзур яркьуди тарабгъбан хатIа а.
Гъийин йигъаз, Китай ктарди, 102 уьлкейиъ аьзарлуйир ашкар дапIна. Аьхиримжи йигъари сарпи аьзарлуйир Гондурасдиъ, Боливияйиъ, Панамайиъ, Монголияйиъ, Турцияйиъ ва Ямайкайиъ дидихъна.
Дюн’яйиъ SARS-CoV-2 кайидарин уьмуми кьадар 121,5 агъзур кастIан артухъ гъабхьну. Думу уьзриан гъийихдарин кьадар 4,4 агъзуриина удубчIвна, хъа уьзур кубчIвну сагъ гъахьидарин кьадар 66 агъзуртIан артухъ ву.
Сабпи йишв уьзур ачмиш гъабхьи Китайи дибисна: 80,7 агъзур аьзарлу гъахьидар, гьадму кьадарнакан 3,1 гъийихдар ву. Кьюбпи йишв Италияйи, шубубпи йишв – Иранди дибисна.
Аьхиримжи йишвандин ва йигъандин арайиъ (12-пи мартдиз вуйи улупбар) Москвайиъ 6 кас, хъа Москвайин областдиъ – 2 кас коронавирусдиан аьзарлу гъахьну. Мидиз улихьна Урусатдиъ коронавирусдиан иццурайи 20 кас гьисабназ гъадагънайи: дурарикан 2 кас Китайин ватандашар, 17 кас – Италияйиан гъафи Урусатдин ватандашар, 1 кас – Италияйин ватандаш вуйи. Кьюр Китайин ва юкьур Урусатдин ватандашар, сагъ духьну, больницайиан деетну.
Коронавирусдихъди аьлакалу вуди Москвайиъ апрелин 10-пи йигъазкьан 5 агъзуртIан артухъ инсанар уч апIру серенжемар гъахувал къадагъа гъапIнийи. Мидланра савайи, тIягъюн абхънайивализ лигну, мартдин 13-пи йигълан мина Германияйиз, Испанияйиз, Италияйиз ва Францияйиз тIирхру самолетарин кьадар лап цIиб дапIна.
Республикайин Роспот-ребнадзориан туврайи мялуматариинди, Дагъустандиъ коронавирус уьзур кубчIвбан дюшюшар адар. Республикайиъ айи Роспотребнадзорин идарайи гьюкуматдин сяргьятарилан улдучIвру йишвариъ марццишнан ахтармиш’валин ляхин мюгькам дапIна. Мягьячгъалайин аэропорт-наъ, гьюлин портнаъ ва «Ярагъ-Къазмаляр» машинар деетру пунктнаъ гъягъру ва гъюру инсанар ахтармиш апIру тяминатар дивна.
Мягьячгъалайиъ айи сарикан тмунурикна тарагъру уьзрарин, СПИД-дихъди женг гъабхбан республикайин цент-риъ коронавирусдиан аьзарлу гъахьидариз дахъру 50 йишв гьязур дапIна. Центрин аьтрафариин али жаради вуйи корпусдин кьюб сабпи мертебйир аьзарлуйир кьабул апIуз гьязур ву. Госпиталиъ нубатчивалин дестйир тяйин дапIна. Госпиталин начальник Тайгибат Хазамовайи къайд гъапIганси, нубатчивалин дестйир шубур духтрикан, 5 медсестрайикан, 5 санитарикан ва кьюрсана дизинфекция апIру касарикан ибарат ву.
Медицинайин цIийи идарайиз лазим вуйи дарминар ва авадлугъар жара дапIна. «Ич ихтиярнаъ инсандин гъурдлариз лихуз кюмек апIру 18 аппарат а. Эгер му кьадар аппаратар гьудруркIруси гъабхьиш, дурар республикайин медицинайин жара идарйирианра хидича. Коронавирус сагъ апIбаъ ишлетмиш апIру дармнарра гьуркIну ачуз», – гъапну госпиталин начальникди.
Шубубпи мертебайиъ аьзарлу гъахьидарихъди аьлакьайиъ ади гъахьи касар ккаъру йишварра гьязурди а.
