8-9-пи мартдиъ Мягьячгъалайиъ ерлешмиш дубхьнайи, Елена Исинбаевайин ччвурнахъ хъайи стадиондин спортдин залиъ «Мектебариъ волейбол» проектдин дахилнаъди образованиейин идарйирин командйирин арайиъ волейболиан «Арсран туп» ччвур тувнайи республикайин дережайин финалин талитар кIули гъушну.

  

Думу талитариъ Табасаран райондин волейболин командайи сабпи йишв гъибисну. Кьюбпи йишв – Къизилюртдиан, хъа шубубпи йишв – Мягьячгъалайиан вуйи командйириз тувну. Талитариъ гъалиб гъахьи командйир дипломариинди ва тялукь дережйирин медалариинди лишанлу гъапIну.

Республикайин дережайин талитариъ гъалиб хьпаз лигну, Табасарандиан вуйи волейболин командайиз апрелин вазлиъ Волгоград шагьриъ Кьибла ва Кафари Кавказдин регионарин ва Крымдин федералин округдин волейболин командйирин арайиъ кIули гъягъру вари Урусатдин талитарин II этапдиъ иштирак хьуз мумкинвал гъабхьну.

Къайд дапIну ккундуки, гъубшу йисан Табасаран райондиан вуйи команда волейболиан вари Урусатдин регионарин арайиъ кIули гъушу «Арсран туп» ччвур тувнайи талитариъ кьюбпи йишван сагьиб гъабхьну.

Улубкьурайи йисан ихь жигьил волейболистари сабпи йишв гъадабгъур кIури, умуд кивдихьа.