2018-пи йисхъан мина РД-йин Глава Владимир Васильевдин жягьтлувалиинди Дагъустан Республикайиъ уьмриз кечирмиш апIурайи «100 мектеб» проект давам апIури, РД-йин экономикайинна аьтрафарин артмиш’валин Министерствойи, нубатнан ражари проектдиъ мектебар иштирак хьпан бадали, проектдин дахилнаъди гъябгъру конкурсдиз аьрзйир кьабул апIурайиваликан мялум дапIна. Конкурсдиз аьрзйир гъябгъюрайи йисан 10-пи апрелизкьан кьабул апIиди.
Му проект уьмриз кечирмиш апIуз хъюгъхъан мина гъийин йигъаз республикайиъ расвалин ляхнар кайи ва лап читин гьялнаъ айи 334 аьгъювалар тувру идарйир рас гъапIну.
Проектдиъ иштирак хьпан бадали, мектебдиз, республикайин ва райондин бюджетарианси, меценатарин дакьатарин кюмекра дубхьну ккунду. Мидиз улихьна йисариси дарди, цци конкурсдиъ иштирак хьпан шартIариъ дигиш’валар духьна. Думу дигиш’валарин гьякьнаан ва хъанара артухъ мялуматар 8 (8722) 68-01-34 нумрайиз зенг дапIну, гъадагъуз шулу.
Ццийин конкурсдиъ Дербент ва Дагъ. Огни шагьриан, Дербент, Табасаран ва Хив районариан проектдиъ швнуб ва фуну мектебар иштирак шулуш аьгъю апIбан бадали, муниципалитетарин образованиейин управленйирин начальникарихьна илтIикIунза.
Дербент шагьрин главайин заместитель Видади Зейналовди «Табасарандин нурар» газатдиз туву мялуматариинди, гьелелиг шагьриъ проектдиъ иштирак шлу мектебар тяйин дапIнадар. «Цци му проектдиъ цIиб дигиш’валарра гъахьну. Гьаддиз гьякьикьатдиъ му проектдиъ фуну мектебар иштирак шулуш, сабан жаваб тувуз шулдарзухьан», – гъапну дугъу.
Дербент райондин образованиейин управлениейин начальник Пирмали Нов-рузялиевди мялум гъапIганси, Дербент райондиан проектдиъ фуну мектебар иштирак шулаш, гьелелиг гьякьлу вуйи мялумат адар. Хъа гьаци улихь ккимиди вуйи мялуматариинди, Хазар ва Мугъарти гъуларин мектебар конкурсдиъ иштирак хьуз кка. Дугъан гафариинди, район аьхюб вушра, мектебар проектдиъ иштирак хьпаз кюмек апIру меценатар адар, гьаддиз иштирак шулайи мектебарин кьдарра цIиб ву.
Хив райондин образованиейин управлениейин начальник Назаряли Тарлановди туву мялуматариинди, цци «100 мектеб» проектдин конкурсдиъ Хив райондиан Хив, Ляхла, Гъвандикк, ЦIийи Фригъ, АрхъитI, Цнал гъуларин мектебар иштирак хьуз гьязур шула.
Гьамусяаьт думу мектебарин кIулиъ айидари конкурсдиз документар гьязур апIура.
Проектдиъ Табасаран райондиан ва Дагъ. Огни шагьриан фуну мектебар иштирак шулуш, гьеле мялум дар. Му месэлайин гьякьнаан муниципалитетарин образованиейин управленйириан мялуматар гъадагъну, учу дурар газатдин гъюру нумрйириъ тувдича.
