Гьюрматлу дишагьлийир! Улубкьурайи Варидюн’яйин дишагьлийирин йигъ учвуз кIваантIан мубарак ибшри! Ухьу, гьарсар кас, гьаму дюн’яйиз хувал Аллагьди дишагьлийиз амур гъапIну. БицIи вахтнахъанмина дадайин мани хилари ухьуз хъайивал апIуру, дюз рякъюхъ хъаъру. Бабар, дадйир, хпар, чйир – учвуз ккун апIуз, читин вахтна хил гьачIабккуз, хулан манишин уьбхюз, сабурлуди хизандин читинвалар кIул’ина гъадагъуз, вари дердер аьгь апIуз аьгъячвуз.

Инсаниятдин вари деврариъ дишагьли уьмрин, утканвалин ва кIваъ айи аку хияларин лишан вуди гъахьну. Зигьимлу, бажаранлу, назук учву фунуб вушра ляхнихъра хъюгърачва, хизандихъан, бицIидарихъан, багъри Ватандинхъан вуйи жавабдарвал жиларихъди пайра апIурачва.

Хусуси метлеб айи дявдин операцияйиъ иштирак шулайи эскрарин дадйир! Гъи ичв варитIан багьалу инсанар Ватандин къанунар уьрхюри, хизандихьан ярхлаъ а. Ватанди дих гъапIган, ичв баяри уьлкейин саламатвал уьбхюз чпи гьязурди айивал улупну. Дурар игитар ву, ухьу дурариинди дамагъ апIурахьа. Чухсагъул учвуз, гьамцдар баяр вердиш гъапIу дирбаш дадйириз!

Аьзиз дишагьлийир! Учу учв’ин гьяйран вуча. Аллагьди гьаммишан гьамци маш ва фикрар акуди, рюгь марцциди гъитручва. Гъит, ичв улариъ гьарган шадвал ва манишин ибшри, пашманвал яхлаз гъарабхри, кIваъ айи ужудар хиялар кIулиз удучIври. Учвуз ккунидариз ва учву ккунидариз мюгькам сагъвал, хушбахтлу уьмур, дюн’яйиъ ислягьвал ккун апIурача!

 

«Табасарандин нурар» газатдин редакцияйин коллектив