БицIидарин багъдиъ тербияламиш гъапIу гьарсар бицIириз тербиячи чан дадайин, бабан кьяляхъ уьмрин рякъюъ алахъру, чахъан юкIв убгру, чаз ужубна харжиб жара апIуз улупру, гьаргандиз бицIирин кIваъ гъузру инсан ву. Тербиячийин пишейиъ варитIан асасуб – бицIидар ккун апIувал, дурарин терефнаан фтизкIа ккилилигди, дурариз чан юкIв тувуз хьувал ву. Эгер бицIирин кIвахьна рякъ абгуз, бицIирин марцци улариъ айиб урхуз шулдарш, дицир касдикан му пишейин эйсира хьидар.
Гъийин деврин тербиячийин улихь гизаф читин месэлйир дийигъна, фицики гьамусдин бицIидар тIалаблудар ву: дурариз яратмиш апIуз, урхуз-бикIуз, сюгьбат гъабхуз улупну ккунду. Гьаддиз му пише ктабгърудар бицIидар ккуни, ужуб юкIв айи инсанарси гьисаб апIури шулу.
Тербиячийин пише ктабгъу гьамцдар дишагьлийирикан сар Сенабер Аьбдулягьядовна Мягьямедовара ву. Дугъу Табасаран райондин Хючна гъулаъ «Юлдаш» МКОУ-йин образованиейин центриъ ляхин апIури 10 йистIан артухъ ву. Му центрин бицIидарин багъ, Табасаран райондиъси, ихь республикайиъра машгьур ву.
Сенабер Мягьямедова Табасаран райондин АхьитI гъулаъ бабкан гъахьну. Мектеб ккудубкIбан кьяляхъ, дугъу Дербент шагьриъ университет ккудубкIну. Эвленмиш хьпан кьяляхъ, дугъу чан зегьметнан рякъ Хючна гъулаъ бицIидарин багъдиъ тербиячиди ляхин апIури ккебгъну.
Жигьил дишагьли дишлади ляхниъ архьну. Думу чав ктабгъу пишейиз лайикьлу вуйивалиин центрин директорра умудлу гъахьну.
Узу Сенабериз гьамциб суал тувнийза:
– Тербиячийин пише гьаз ктабгънийва?
– Тербиячи – му лап маракьлу пише ву. БицIидарихъди вуйи ляхни жвуваз айи вари аьгъювалар уьмриъ кечирмиш апIуз мумкинвал тувру. Сариз мяълийир апIуз ккунду – сес адар, сариз художник хьуз ккунду – шиклар зигуз шулдар, тмунуриз аьхю спортсмен хьуз ккунду – сагъ’вал адар… Хъа бицIидарин багъдиъ тербиячийихьан чан кIваъ айи вари хиялар тамам апIуз шулу – мяълийир, ялхъвнар апIуз, шиклар зигуз, яратмиш апIбан ляхниин машгъул хьуз. БицIидарин багъдиъ кми-кмиди утренникариз гьязур шлуган, бицIидар гьязур апIруган, художник хьувалра, артист хьувалра, ялхъвнар-мяълийир апIувалра алабхъуру.
БицIидар гьюрматназ, хъу-гъ’вализ ва дуствалин аьлакьйириз варитIан лайикьлу инсанар ву. БицIири хабар алдагъиган, яв гъюниин кIул дивиган, кIваз гизаф хуш шулу. Узу йиз пишейиин гизаф шад вуза, бицIидарин шадлу аьлхъбарин, марцци фикрарин, аку хияларин арайиъ хьувал – му инсандин бахт ву.
Учухьна гъюру бицIидариз хилиъ дюзди муччвур бисуз, чпиин палтар алахьуз аьгъяди шулдар. Хъа бицIидарин багъдиан деетруган, дурар мектебдиз гъягъюз гьязур вуйи бицIидар шулу. Гьаддик тербиячийин гизаф аьхю пай ка.
Тербиячивалин кеспнахъ хъайирикан гизаф улхуз шулу. Ухьу хизандиъ сар-кьюр бицIирикан инжик духьну шулхьа. Хъа учву фикир апIинай, бицIидарин багъдиъ айи тербиячйир 20-30 бицIирин гъайгъушнаъ шулу.
Гьюрматлу Сенабер Аьбду-лягьядовна, увуз Аллагьди мюгькам сагъ’вал ва бахтлу уьмур тувривуз. Уву бахтлу гъахьиш, уву тербия туврайи бицIидарра шаду уьмрин эйсйир хьиди. Яв машквар мубарак ибшри!
