Дагъустандиъ 25-пи апрелиъ вари Урусатдин «Библионочь-2020» акция ачмиш гъапIну. Гъябгъюрайи йисан думу серенжем #75словПобеды онлайн-марафон саягъниинди кIули гъабхура. Думу марафондиъ юкIв хъайидарихьан варидарихьан иштирак хьуз шулу.
Серенжем РД-йин культурайин министр Зарема Бутаевайи Эфенди Капиевдин «Фронтдиан вуйи кIажар» яратмиш апIбариан паяр урхбиинди абццнийи. Министрин кьяляхъ му эстафета республикайин культурайин вари идарйири, мектебари, Дагъустандин ва Урусатдин лайикьлу ишчйири ва машгьур касари давам гъапIнийи. Дурарин арайиъ Гьюкуматдин табасаран драмтеатрин артистар, «Лезгинка» ялхъвнарин Гьюкуматдин академический ансамблин генеральный директор Жамбулат Мягьямедов, РД-йин Халкьдин артистар Хан Баширов, Светлана Мусаева, РД-йин лайикьлу артистар Марьям Къазиева, Аьбдуллагь Мирзакеримов, Майсарат Аьбдулмежидова ва хайлин жарадар айи.
Ватандин Аьхю дявдин Гъалибвализ бахш вуди, Табасарандин дишагьлийирин Союзди, Гьюкуматдин табасаран драмтеатри, Хив райондин библиотекайи ва жара идарйирира Ватандин Аьхю дявдин Гъалибвалин темайиан акцйир ва флешмобар ачмиш дапIна.
Му акцйир майдин 9-пи йигъазкьан давам хьиди. Зиихъ кудухнайи ва гьацира РД-йин культурайин Министерствойин, РД-йин милли библиотекайин ва дурарин дахилнаъ айи жара идарйирин интернетдин хусуси машариъ гьар йигъан цIийи иштиракчйирин ляхнарихъди таниш хьуз мумкинвал а.
Марафондиъ иштирак хьпан бадали, Ватандин Аьхю дявдин темайин фунур-вушра авторин шиир, мяъли вая кагъаз, ясана яратмиш апIбан саб кьатI урхури, видеоролик адабгъай. Думу ролик инстаграмдин ичв хусуси машнаъ @biblioteka05 @minkultrd аккаунтарикк ва #75словПобеды, #библионочь2020 хештегарикк тувуз вая гьадму ва tabasarandin_nurar,_soyuz_zhenshin_tabasarana, khivbiblioteka инстаграмарин машариз хътапIуз шулу.
Коронавирусдин инфекцияйихъди аьлакьлуди гьамусяаьт арайиз дуфнайи аьгьвалат къайдайиз гъюбан кьяляхъ, «Библионочь-2020» акцияйиъ варитIан ужуди иштирак гъахьи хьур касдиз РД-йин культурайин Министерствойин терефнаан театриз чпи ктагъу спектаклариз гъягъюз кью-кьюб билет тувди.
