Гьюрматлу дишагьлийир!
Мартдин 8-пи йигъан вари дюн’яйиъ хьадукран аку машквар – Варихалкьарин дишагьлийирин йигъ къайд апIуру.

Думу аку машкврихъди аьлакьалу вуди пуз ккундучузки, дишагьлийи ихь уьмриз уж’вал, утканвал ва рягьимлувал хуру, думу гьарган ислягьвал уьбхбан гъаразнаъ шулу ва гьарсаб ляхниъ кюмек тувуз гьаммишан гьязур ву. Дугъу хизандин сагъ-саламатвал уьбхюру, веледариз ва худлариз тербия тувру, дюн’я аку апIуру, дирбаш ляхнарихъ хъаъру.

Гъийин йигъан дишагьлийир, хулан манишин уьбхюри, хизандиз вафалуди гъузри, юкIв убгури, жилариз барабар духьну, уьмрин вари цирклариъ лихура, пишекарвалин заан кIакIар табигъ апIура.
Гьамусдин деврин хизанариъ кьюр-шубур бицIиртIан адар. Хъа табасаран миллетдин арайиъ йицIур ва артухъ бицIириз тербия туву игит бабар гизаф а. Дурарин зегьметнахьна хъана аьхю гьюрматниинди янашмиш шулахьа. Дадйирин дирбаш’валин, даърахди гьау йишварин, кIваз гъахьи аьзабарин улихь кIул ис апIурахьа.

ВаритIан ккуни дадйир, бабар, хпар, шубар, чйир!
Учву гьарган ихь жилиин уьмур тувбан, гюзелвалин лишанди гъуздичва. Гъит, Первердигар Аллагьди учвуз ва ичв веледариз мюгькам сагъ’вал туври, ичв хизанариан берекет кам дарапIри, учву хушбахтлу уьмрин эйсйир апIри, хъа ихь дюн’яйиъ гьаммишан ислягьвали агъавал апIри!

«Табасарандин нурар» газатдин редакцияйин
коллектив