Дагъустан Республикайин агьалйирин асас фикир гьамусяаьт коронавирусдихъди вуйи аьгьвалатниина жалб дапIна. Амма республикайиъ зирзибилихъди аьлакьалуди арайиз дуфнайи аьгьвалат гьич саринра кIваълан дубшнадар.

  

Республикайин саспи муниципалитетариъ, гьадму гьисабнаан Табасаран райондиъра хъархъсихъди вуйи аьгьвалат лап читинуб ву.

Республикайиъ къанунсузди зирзибил дабхьрайи урслар терг апIбан бадали, РД-йин экологияйинна табиаьтдин девлетарин Министерствойи региондин шагьрар-районарихъди сатIиди ляхин гъабхура. Мисалназ, апрелин вазлин арайиъ Каспийск, Дагъ. Огни, Буйнакск шагьрариъ ва Табасаран, Ахцигь, Мягьярамкент, Къарабудагъкент ва СтIал Сулейман районариъ 160 гектар жиларилан къанунсузди дабхьнайи зирзибил техникайихъди марцц дапIна. Думу хъархъсин саб пай жилариъ абхьну элебкну, хъа тмунуб пай зирзибил дабхьуз гьязур дапIнайи майднариина гъубхну.

Му месэлайин гьякьнаан РД-йин экологияйинна табиаьтдин девлетарин министрин сарпи заместитель Заур Римихановдин мялум гъапIганси, республикайиъ къанунсузди зирзибил дабхьрайи йишвар арчлиъ тIаъну адрувализ лигну, багарихь яшамиш шулайи агьалйирин мал-къарайи урслариина дубхнайи хъархъсар, чIуруб-чIюрхюб ипIури гъахьну.

Мидланра савайи, гьамусяаьт коронавирусдихъди аьлакьалу вуди, муниципалитетариъ ишлетмиш гъапIу маскйир, бегьлийир урслариина гатIахьура. Хъасин дурар вари зирзибил дабхьрайи йишварихь уч шула. Гьаддиз, Заур Римихановди къайд гъапIганси, эгер гьадму зирзибилик цIа кабхъиш, багарихь яшамиш шулайи касарин сагъламвализ диди чIуру тясир апIуб мумкин ву. Гьацдар дюшюшар дархьбан бадали, министерствойи къанунсузди зирзибил дабхьрайи йишварин аьгьвалат гюзчиваликкна гъадабгъну, дурар терг апIбан бадали, серенжемар гъахура.

Му месэлайин гьякьнаан Табасаран райондиъ айи аьгьвалат фициб вуш, учу гъюру нумрйирикан сабдиъ хабар тувдича.