Ихь бицIи халкьдин арайиъ зегьметниин юкIв али инсанар гизаф а. Зегьмет зигру касариз хулаъра, ляхниъра, жямяаьтлугъдин арайиъра гьарган аьхю гьюрмат ади шулу. Гьаму шиклиъ учвуз рякъюрайи Фатма Гьясанбеговна Мягьямедовара гьацдар касарин жергейиан ву. Улихьнаси дугъан 70 йис тамам гъабхьну.
Фатма Гьясанбеговна 1950-пи йисан Табасаран райондин Хючна гъулаъ Айдемироварин хизандиъ бабкан гъахьну. Мектебра ужудар аьгъювалариинди ккудубкIну, думу Мягьячгъала шагьриъ Дагъустандин гъулан мяишатдин институтдин экономикайин факультетдик урхуз кучIвру. Институтдиъ урхури имиди дугъаз уьмрин ужур юлдашра кьисмат шулу – Мягьямедрасул Исмяилович Мягьямедов. Мягьямедоварин хизанди гизаф пай вахт жигьил наслиз илим ва коммуниствалин тербия тувбан гьюрматлу вазифайиз сарф апIури гъахьну. Мягьямедрасул Исмяилович, ДГУ-йин химияйинна биологияйин факультет ккудубкIну, Табасаран райондиъ савадлу инсанар ва мялимвалин кадрйир лап цIиб, хъа дурариъ айи игьтияж аьхюб вуйи йисари Пилигъ гъулаъ хайлин вахтна мектебдин директорди гъилихну.
1974-пи йисан Мягьямедрасул Мягьямедов аспирантурайик урхуз кучIвру, ва дурарин таза хизан Мягьячгъала шагьриз кючмиш шулу. СацIиб вахтналан Мягьямедрасул сельхозинститутдиъ илмарин кандидатра шулу.
Мягьямедовар Дагъустан-дин НИИСХ-йиъ ляхниз кьабул апIуру. Институтдиъ саб кьадар йисари баркаллуди ва намуслуди ляхин гъапIган, дурар кьюридра 1987-пи йисан заан пишекрарси Монголияйиз ляхин апIуз гьаъру. Харижи уьлкейиъра хайлин йисари дилихну, Мягьямедовари чпи ляхин апIури гъахьи гьарсаб райондин жямяаьтдин арайиъра ужуб ад ва лайикьлу гьюрмат гъазанмиш гъапIну.
1991-пи йисан Мягьямедовар ватандиз хътакуру. Саратовский областдиъ фермермвалин хусуси мяишат ккебгъну, дурари кьюд агъзур гектар жил арендайиз гъадабгъуру. Гьар йисан рягьимлувалин акцияйин дахилнаъди дурари касиб инсанариз, йитимар айи хулариз кюмекар апIури гъахьну. Арайиан гизаф йисар гъушнушра, дурар гъилиху уьлкейин ва регионарин агьалйири Мягьямедоварин гьюрмат, аьхю инсанвал, заан къанажагълувал кIваълан гьапIундар. Мягьямедрасули ва Фатмайи тербия туву веледарира гьамусяаьт жямяьтлугъдин арайиъ лайикьлу йишв дибисна, уьмрин жюрбежюр цирклариъ хъуркьувалиинди ляхин апIура. Альбертди ва Арсенди гъи дюн’яйилан гъушу абайин ляхин давам апIура – дурар кьюридра илмарин кандидатар ву. БицIинур бай Заур Москвайиъ Урусатдин МИД-дин гъуллугъчиди лихура.
Гъи Фатма Мягьямедова, чан уьмур жямяьтлугъдиз мянфяаьт кайи ляхнариз сарф дапIну, лайикьлу рягьятвализ – пенсияйиз удучIвна. Чан яш 70 йис вушра, дугъу чан баярихъди сабси уьлкейиъ инсаниятдин аку гележегдин бина яратмиш апIбан вари халкьдин уьмуми ляхник чан зегьметнан лайикьлу пай киври ими.
Фатма Гьясанбеговнайин 70 йис тамам хьувал мубарак апIури, дугъаз жандин сагъ’вал ва хизандин хушбахтвал ккун апIурача.
