Январин 30-пи йигъан Мягьячгъала шагьриъ «Дагъустан» культурайин Дараматдиъ, «Халкьдин» ччвур тасдикь апIбаз бахш вуди, халкьдин театрарин арайиъ республикайин серенжем гъабхьну. РД-йин Минкультурайин халкьдин яратмишарин республикайин Хулан пресс-гъуллугънаан мялум гъапIганси, му серенжем театрарин Йисан дахилнаъди гъубхуб ву. 

Серенжемдиъ Хив, АхцIигь, Бабаюрт, Къули, Къурагь ва жара районарин коллективар иштирак гъахьну.Коллективарин сягьнйириз кьимат туврайи комиссияйин дахилнаъ РФ-дин ва РД-йин искусствйирин ла- йикьлу деятелар, культурайин гъуллугъчйир, искусствоведар айи. Театрарин коллективари сумчрин аьдатар, хизандин уьмриан зарафатнан дюшюшар улупну. Жюрийин вакилари УнцIукIул, ЧIарода ва БотIлих районарин халкьдин театрарин сягьнйириз заан кьимат тувну.