Табасаран эскрар – Ватандин Аьхю дявдин иштиракчйир

 

Минатуллагь Уьсманович Базутаев

1913-пи йисан Табасаран райондин ТIивак гъулаъ нежбрин хизандиъ бабкан гъахьну.

 

1933-пи йисан йирхьуб вазлин курсар ккудукIну, думу, багъри гъулаъ савадсузвал терг апIури, мялимди лихуз хъюгъну. 1940-пи йисан Минатуллагь Уьсманович ВКП(б)-йин членди кьабул гъапIну, Табасаран райондин комсомолин комитетдин сарпи секретарди лихури гъахьну. Чаз бронь айивализ дилигди, 1942-пи йисан думу жвуван хушниинди дявдиз гъушну.

Минатуллагь Базутаев сифте Кубандиъ дявдин женгариъ иштирак гъахьну. Фашистарихьан шагьрар, гъулар азад апIруган, эскриз гъургу хулар, ккадахьу гъулар рякъюри гъахьну. Гьаддиз дугъу чан аьхюну гъардшиз, ватанагьлийирикан фронтдиз кюмек тувуб ккун апIури, кагъаз гъибикIну. Кагъаз райондин партияйин, комсомолин тешкилатариъ, мектебариъ, колхозариъ, халачйирин артелариъ гьял гъапIнийи.

Минатуллагь Базутаевдин ватанагьлийири фронтдиз гъапIу кюмекназ И.В.Сталинди Гьюрматнан кагъзиинди жаваб тувнийи.

1943-пи йисан зиян дубхьну, Минатуллагь госпиталиъ ади гъахьну. Ватандин Аьхю дявдин женгариъ улупу дирбаш’вализ кьимат вуди, Минатуллагь Базутаевдиз «1941-1945-пи йисари Ватандин Аьхю дявдиъ Германияйиин гъалиб хьпаз лигну» медаль тувну, дугъаз гьюрматнан жюрбежюр грамотйир айи.