9-пи май – ихь варидарин юкIвариъ хусуси йишв дибиснайи, метлеблу йигъ ву. Му йигъан шадвална дерд сатIи шулу, Гъалибвалин бахтна Ватандихъан вуйи дамагълувал ва дявдин женгариъ гъийихдарихъан зигурайи иццрушин чиб-чпихъди ктикьуру.
1945-пи йисандин кюкю адабшвнайи майин ваз улубкьхъан мина магьа 75 йис гъубшну. Амма, гьаци вушра, гьар ражари 9-пи май улубкьруган, инсандин юкIв шадвалиан тIубкIури ва пашманвалиан чIюбкьюри шулу. Му йигъ ухьуз гьарсариз гьаммишан варитIан акуб, пак’валинуб, гирамиб ва важиблуб вуди гъубзди. Дидиъ, читин йисари сатIи духьну, жвуван Ватан гъюбхю аьдати ватандашарин кьудратлувал, рюгьнан кьувват, гьяйбатлувал ва заанвал атIагна. Ва, гъи ухьуз рябкъюрайиганси, йисар гъягъбахъ ихь абйири, адшари улупу гьунарарин – багъри жиларилан фашистарин чапхунчйир терг дапIну, азадвал гъазанмиш гъапIу эскрарин гьунарарин, далу терефнан зегьметкешарин гьунарарин, Аьхю Гъалибвал багахь апIури гъахьи зурба гьюкуматдин гьарсар касди улупу гьунарарин – тарихи суйлувал ва мяна хъана гьяйбатлу шула.
Совет халкь Ватандин Аьхю дявдиъ гъалиб духьну 75 йис хьпаз тялукь вуди, 2020-пи йис ихь гьюкуматдиъ кIваин апIбан ва машгьурвалин Йисси мялум дапIна. Гьяйифки, Ватандин Аьхю дявдин къурхулу йисар ккадау игитарин кьадар йислан-йисаз цIиб шула, му пис дявдин чIиви шагьидар гъузрадар. Гьаддиз гъийин деврин наслин гирами буржи – ихь Ватан гъюбхю гьарсар эскрин ччвур уьбхювал ва гъюру насларихьна тувувал ву. Ватандин Аьхю дявдин эскрар, чIивидарра, гъи-йихдарра, Ватан фици ккун дапIну ккундуш, дидин гьюрмат, намус-гъир’ят ва азадвал фици дюрхну ккундуш, ухьуз нумуна ву.
Ватандин Аьхю дявдиъ иштирак гъахьи гьарсар эскрин ччвур гъизилин гьярфариинди райондин, шагьрин, республикайин, уьлкейин, вари инсаниятдин тIарихнаъ атIабгна. Вахт гъубшну кIури, ихь халкьди гъадабгъу Гъалибвал ктIубшвуз шлуб дар. ЙицIбариинди йисар гъягъюри, наслар дигиш шула, амма Аьхю Гъалибвал, ихь халкьдин дирбаш’валин, милли дамагънан лишанси, вари инсаниятдин тарихнаъ даимлугъ гъубзди.
Зурба аьзабар дизигну, ккюргъну ихь аьхю нас-лари гъазанмиш гъапIу му Гъалибвали ухьуз ислягьвалиинди яшамиш хьуз, саламатди ляхин апIуз, хизанар яратмиш апIуз ва бицIидариин, худлар-гудлариин шад хьуз мумкинвал тувну. Му ухьу вари сатIи апIурайи ва фицдар вушра дарваларин улихь ккагъуз даршлуганси апIурайи дюшюш ву.
Ихь гардандиъ айи сабсана буржи – му пис дявдиъ ухьу Гъалибвал фициб кьиматнахъ гъадабгънуш, кIваинди гъибтувал, му дявдиъ гъийиху касарин гьюрмат уьбхювал ва, эрг’вал адарди, ветеранарин гъайгъу зигувал ву.
Ухьу дявдин ярхи рякъяр ккадау, хъасин дявдин кьяляхъ гъагъи йисари цIа кабхъну дубгнайи, хараб-йириз дюнмиш дубхьнайи уьлке за гъапIу ихь абйириз ва адшариз икрам апIурахьа. Дурарин гьаргандиз гъубз- ру гьунарназ тамамди чухсагъул ва аферин пуз гафар гьуркIудар. Игитвал, намуслувал, гъучагъ’вал, жюрэтлувал, сабурлувал, жвуван халкьдиз вафалувал, жвуван Ватан ккунивал – гьаму лишнар улупунчва, гьюрматлу ветеранар, Ватандин Аьхю дявдиъ ва дявдин кьяляхъ йисари. Зурба Гъалибвалин ирс гъурубкьу, му йигъ кIваин уьбхюрайи ва къайд апIурайи гъийин наслира гьаму лишнар кьабул апIурхьа. Ислягьвалин вахтна бабкан гъахьи ухьу, майин гьаму гирами машкврихьна лап заан дикъатлувалиинди, кIвак гукIнишин кайивал гьисс апIури янашмиш духьну, Ватандин Аьхю дявдин ветеранари улупу гьунарариз лайикьлудар хьпан бадали, ухьхьан удукьруб вари апIидихьа.
Ватандин Аьхю дявдин гьюрматлу ветеранар, далу терефнан зегьметкешар, вари ватанагьлийир! Учву вари Ватандин аьхю дявдиъ Гъалибвал гъадабгъну 75 йис хьпан машкврихъди тебрик апIурача! Учвуз марцци кIваан мюгькам сагъ’вал, ярхи уьмур, рюгьнан манишин, бахт ва кIул’ин гьаммишан аку, ислягь завар хьувал ккун апIурача!
