Февралин 5-пи йигъан Дербент шагьрин варидюн`яйин культурйирин ва тарихарин музейиъ абццу ихь табасаран халкьдин художник Мягьямед Мурадовдикан учу газатдиъ гъибикIнийча.
Хьадукран 1-пи йигъанра му тешкилатдиъ «Живопись ва Поэзия» кIуру серенжем кIули гъубшну. Му мяракайиъ Дербент шагьрин главайин заместитель Жалалутдин Аьлирзаев, культурайин управлениейин начальник Нармина Балогланова, Мягьячгъала шагьриан Тахо-Годийин ччвурнахъ хъайи институдиъ лихурайи Ширинат Жамалиева, шагьрин музеярарин пишекрар, табасаран, азербажан ва лезги халкьдин шаирар, писателар, табасаран драмайин театрин актёрар, мяълийирин устадар иштирак гъахьну.
Серенжем абццри, музейин директорин заместитель Самиля Нажафовайи художникдин яратмиш апIбарихьна вуйи маракьлувал аьхюб вуйибдикан, му вахтнан арайиъ выставкайиз мектебариъ урхурайи баяр-шубар, студентар ва гьацира искусствойиин юкIв алидар гъафиб тасдикь гъапIну ва мярака кIули гъабхуз Эльмира Аьшурбеговайиз гаф тувну.
Эльмира Аьшурялиевнайи художникдин творчество дилигну гьудучIвруб дарубдикан, мушваъ деринвал айибдикан гъапнийи Исмяиловичдиз гаф тувну.
«Узу му выставка абццруганра серенжемдиъ иштирак гъахьунза. Художник зигьимлур вуйиган, искусствойин гъаври ахъуб читинди дар. Узу гизаф рази вуза мициб мярака кIули гъябгъюрайивалиин ва Мягьямед Мурадовдиз хъуркьувалар ккун апIураза»,
– гъапну чан улхбаъ Жалалутдин Аьлирзаевди. Аьхиримжи вахтна мяракйириъ жанлуди иштирак шулайи ихь халкьдин ашукь Хидирбег Хайирбеговди «Табасаран» кIуру мяълийиинди серенжемдин сабпи пай ккебгъну. Му пайнаъ художникди дизигнайи шикларин тясирнаккди Дербентдиъ яшамиш шулайи шаирари гъидикIу шиърар гъурхну.
Мяракайин кьюбпи пайнаъ художникди шаирарин шиърариз, ихь артистари апIру мяълийириз кофеграфия къайдайиинди гъидикIу шикларин багахь духьну шаирари шиърар гъурхну, Марьям Кьазиевайи, Аьбдулла Мирзакеримовди, Шамсият Прачевайи, Зейнаб Дербендлийи мяълийир гъапIну. Дугъриданна, саб вазтIан цIиб вахтнан арайиъ Мягьямед Мурадовдин 11 цIийи шиклар арайиз гъафну ва ебцIру (растворимый) кофе ва шид ишлетмиш дапIну, уткан шиклар гъидикIну. Дурарихъ кофейин ицци ниъра хъайи.
Гьар вахтна шагьриъ гъягъру серенжемариъ иштирак шулайи ихь театрин актёрарира устадвалиинди му йигъан «Гъала» кIуру пьесайин кьатI улупну.
Ширинат Беглеровнайи му серенжемдиз ужуб кьимат тувнийи ва искусствойи жюрбежюр динарин, миллетарин халкьар сатIи апIурайиб къайд гъапIнийи.
Дербент шагьрин администрацияйин культурайин управлениейин кIулин пишекар Гюльпери Мирзабалаевайи тасдикь гъапIганси, Мягьямед Мурадовдин искусствойи эдебниинди яшамиш хьуз улупури, инсанариз халкьдин тарихдихьан, культурайихьан ярхла махьанай кIура.
Выставка март вазлин 15-пи йигъазкьан давам хьибди. Музейин пишекрар учвуз ккилигура, аьзиз ватанагьлийир!
