Гъябгъюрайи йисан январин аьхирариъ Калининград шагьриъ спортдин ММА жюрйириан пишекарвалин кчIихбарин вари халкьарин чемпионат кIули гъубшну.
Думу талитариъ ихь машгьур спортсмен Багьаудин Абасов ва Табасаран райондин Хюрикк гъул’ан вуйи жигьил спортсмен Ражаб Уьмаров иштирак гъахьну. Дагъустандиан Калинин-граддиз, ихь баярин тереф уьбхюри, 30-тIан артухъ жигьилар гъушнийи.
Багьаудин Абасов («Спартанец») вари дюн’яйин жюрбежюр аьхю талитариъ 16 ражари гъалиб гъахьир ву.
Думу вари халкьарин заан дережайин спортдин мастер, ушу-саньдайиан кьюб ражари вари дюн’яйин чемпион, универсал кчIихбариан вари дюн’яйин ва Урусатдин чемпион, панкратиондиан вари дюн’яйин чемпион, комплексный кчIихбариан шубуб ражари Урусатдин чемпион, армияйин хиларихъди кчIихбарин жюрйириан Урусатдин чемпион ву. Дугъахъди кчIихуз удучIву Михаил Романчукра дирбаш спортсмен, кикбоксингдиан спортдин мастер, Китайдиъ жюрбежюр талитариъ швнуб-саб ражари чемпион духьнайир ву. Дурар кюридра кчIихбан ужуб техника, устадвал айидар вуйи ва талитарихьна ужуди гьязур духьнайи.
Багьаудин Абасовди кчIихбарин вахтна ужуб устадвал улупну. Михаил Багьаудинди ужуб техника ади йивурайи гъурдариккан фукьан ккудучIвуз чалишмиш шули гъахьнушра, ихь ватанагьлийи дугъаз гъалиб хьуз мумкинвал гъибтундар. Вари шубби раундариъра Багьаудин гъалиб гъахьну.
КчIихбар ккудукIбалан кьяляхъ, Багьаудин Абасовди чан тереф уьбхюрайи тамашичйириз, чахъан юкIв убгурайидариз, чав талитарихьна гьязур гъапIу юлдшариз, тешкилатчйириз чухсагъул мялум гъапIну, чахъди кчIиху Михаил Романчукдин устадвал, дирбаш’вал жаради къайд гъапIну.
Гьяйифки, ихь кьюрпи спортсмен, Ражаб Уьмаров, му талитариъ магълуб гъахьну. Ражабди бицIи вахтнахъна мина Агъамирза Рамазановдин регьберваликкди тхэквондойиан, хъасин машгьур спортсмен, тренер Назим Гьяжиевдин хиликк ушу-саньдайиан аьгъювалар гъадагъну. Ражаб Уьсманов ММА-йин кчIихбарин жюрйириан живанарин арайиъ юкьуб ражари Дагъустандин чемпион, ушу-саньдайиан живанарин арайиъ Урусатдин чемпион вушра, Калининграддин областдин чемпион Анатолий Макаркин дугъ’ин гъалиб гъахьну. Ражабдин гьеле 20 йистIан дар. Думу аьхю спортдин рякъю учIври ами.
Багьаудин Абасов гъалибвалихъди тебрик апIури, дугъаз ва ихь вари спортсменариз гележегдиъра хъана заан хъуркьувалар, гъалибвалар, маракьлу кчIихбар ккун апIураза.
