Гафнан устад, бажаранлу ва лайикьлу мялим Гьяжимирза Аьбдуризаевди цIиб улихьнаси чан бабкан духьну 60 йис хьувал къаршуламиш гъапIну.
Гьяжимирза Рашидович 1960-пи йисан 12-пи майиъ Хив райондин Заан Яракк гъулаъ зегьмет зигбиин гизаф юкIв али нежбер Рашид Аьбдуризаевдин хизандиъ бабкан гъахьну.
Асккан Яракк гъулаъ кьялан мектеб ккудубкIну, дугъу 1979-1981-пи йисари Советарин Армияйиъ, Ватан уьбхбан буржи лайикьлувалиинди тамам апIури, Севастополь ва Керчь шагьрариъ дявдинна гьюлин флотдиин гъуллугъ гъапIну.
Армияйин кьяляхъ, Гьяжимирза Рашидов Воро-неж шагьриъ мялимвалин курсарик урхуз кучIвру. Тарихнан дарсар кивру мялимвалин пише гъадабгъну, думу 1987-1988-пи урхбан йисан Пермь областдин Соликамск шагьрин 12-пи нумрайин мектебдиъ тарихнан дарсар кивру мялимди гьаъру, хъа 1988-пи йисхъан мина гъийин йигъазкьан Гьяжимирза Рашидовичди Каспийск шагьриъ 1-пи нумрайин мектебдиъ мялимвалин пише давам апIура. Сифте йисари дугъу тарихдин, хъасин обществознаниейиан дарсар киври гъахьну, хъа 1998-пи йисхъан мина улупнайи мектебдин завучди лихура.
Гьар урхбан йисан Гьяжимирза Рашидовичдин регьберваликкди дугъу аьгъювалар туврайи баяр-шубари, жюрбежюр конкурсариъ, олимпиадйириъ, республикайиъ ва шагьрариъ кIули гъягъюрайи жара серенжемариъ аьхю иштагьниинди иштирак шули, гъалибвалин ва пешкешнан йишвар гъадагъура.
Гьяжимирза Рашидович-дин хиликк урхурайидар, тарихнан ва обществознаниейин дарсариан ГИА-йиан ужудар хъуркьувалар улупури, гьар йисан вузарик ва сузарик урхуз кучIвра.
2003-пи йисан Гьяжимирза Аьбдуризаевдин пишекарвалин дережа «РФ-дин уьмуми образованиейин гьюрматлу гъуллугъчи» ччвур тувбиинди лишанлу гъапIну, хъа 2008-пи йисан думу «Дагъустандиъ варитIан дирбаш мялим» кIуру конкурсдин гъалибчи ва 100 агъзур манат премияйин сагьиб гъахьну.
Гьяжимирза Рашидович, лайикьлу мялимси, ужуб хизандин эйсира ву. Дугъу чан шубрид баяризра заан дережайин образование тувну, дурар эвленмиш дапIну, хизан-кюлфетдин эйсйир ктаъну. Дугъан бай, ММА жюрейин спортдин кчIихбариан вари дюн’яйин гъалибчи Эмин Аьбдуризаев аьгъдрур ихь ватанагьлийирин арайиъ тек-бирра адаршул.
Гьяжимирза Рашидович рякъ-хулиъ алахъу юлчийиз яракар шлу касра, ужур насигьятчира, гаф-чIалнан устадра ву. Фицики, дугъу ихь ватанагьлийирин варжариинди сумчрариъ чавуш`вал дапIна.
Узуз Гьяжимирза Рашидович 2019-пи йисан Мягьячгъалайиъ кьюб гьяфтайин арайиъ кIули гъушу завучарин курсариъ хъана лап багахьди аьгъю гъахьунзуз. Дугъахъди сатIиди гъушу кьюб гьяфта кьюд йигъсира гъахьундариз – гьадмукьан шаду, саб артухъ невс адру, жара касдин хайир-шейир жвуванубси гьисабназ гъадабгъру, машнаан мани уьлиси нур туврайи кас ву. Гьелбетда, Гьяжимирза Аьбдуризаевсдар зегьметнан заан тажруба айи халис мялимар, узусдар, тазади ликар алдагъурайи жигьил мялимариз нумуна ву.
Узуз йиз ва учухъди дес-тейиъ гъахьи завучарин терефнаан Гьяжимирза Рашидович ккудубшу бабкан гъахьи йигъахъди марцци кIваан тебрик апIураза. Гъит, яв кIул`ин гьарган алтIабгнайи укIу зав, худлар-гудларин шад сесери абцIнайи хизан, суфрайихъ берекет, мюгькам сагъ`вал, ляхниъ заан хъуркьувалар ишри, Гьяжимирза Рашидовичдиз!
