Инсан аьжайиб ва жан али назук шейъ ву. Дугъаз чан кIваъ айиб, фициб-вушра жини сир пай апIру кас лазим шулу. Думу кас, гьелбетда, я жвуван багъридарикан духьну ккунду, ясана вафалу дуст.
Ихь уьлкейиъ 9-пи июнь дустарин Йигъси тяйин дапIна. Хъа жвуван юкIв кабсру, гьякьлу ва вафалу дуст айихъан мина, хъугъай, гьар йигъ машквар ву.
Ихь абйир-бабари чпин тахаллусариъ гьаци кьастIан кIурайиб дар: «Дуст адарш – аг, хъа гъидихъур – уьрх!» Гьякьлу ва вафалу дуст алахъувал инсандин кьисмат ву, хъа думу уьрхювал, чвеси ва чиси дисувал, ккун апIувал – инсандин бахт! Жвуван далу уьбхру, уьмрин шад ва пашман геренариъра увухъди шлу кас айивал – мутIан аьхю савкьат шулинхъа?
Гьелбетда, варидиз мялум вухьуз, дуствал дуснайи суфрайихъ завун аьршдиз удучIврустар гафариинди я шлуб, я дюбхну ккуниб дар. Дуствали чан гьякьлу лишан ва сурат лазим вуйи дакьикьайиъ яракар ва бакар хьувалиинди улупуру.
«Увуз – жвугъри, узуз – мишмиш» дарпиди, «увуз айиб узуз гьаз адар?», «узу увуз гъапIубдин, тувубдин гьацIсибкьан гъапIундарва узуз», «накь узу увухьна гъафунза, гъи уву узухьна гъач» кIуру гафар-чIалар эгер арайиъ ади гъабхьиш, икибаштIан, думу дуствал дар, хъа анжагъ жара кас чан мянфяаьтназ ишлетмиш апIру гвачIин-хябяхъ ву.
Гьациб юкIв мухриъ ивну, узуз даккниб дустразра ккун дарапIарза дупну, гъапи гаф-чIал дюбхну ва кIулиз адабгъну, дустран шадвалин ва хажалатнан, сумчрин ва саламдин ирс жвуванубси гьисс дапIну, лазим гъабхьиш, жвуван ифдин цIадал гьяйиф дарапIди, гьациб сар-сарихьна вуйи гьякь-гьюрматнан шил ва хъугъ’вал айи дуствализ вафалу дуствал кIуру.
Узуз ихь рякъ-хулиъ алахьру ярар-дустар узу дупнайи аьхиримжи гафар-чIалар уьрхру ва гьадму инсанвалин шартIар кайи касарикан духьну ккундузуз. Гъит, ихь дустар ва дустариз ухьу гьарган уж’валнан ляхнар-карариъ бакар ва ужудар сяътариъ яракар ишри! Дустрахъди алдабгъру лик, апIру гаф-чIал ва хайир-шейир кьюбиб терефаризра мясляаьт уьбхруб ва бахт кайиб ибшри!
