Жикъи муддатнаъ коронавирусдин пандемияйин натижайиъ мялум гъапIу карантинди дагъустанлуйирин уьмур хабарсузди дибдиан дигиш гъапIну гъапишра, кучIал шулдар. Уьзри кьюб вазлин арайиъ варжариинди ихь ватанагьлийир уьмрихъ мягьрум гъапIну. Арайиз гъафи гъагъи аьгьвалатназра чан себебар адарди дар: уьзрин цIийивал, аьзарлуйирин кьадарнан аьхювал, дурариз гьарсариз кюмек тувбаъ духтрарин кьитвал. Му улупбар варитIан асасдар гъахьну.
Дяви жюрбежюруб шулу кIуру гафарин деринвалин узу якьинтIан гьамус гъавриъ гъахьунза. Фицики 2020-пи йисан хьадукру инсаниятдиз цIийи рангнан дяви мялум гъапIну. Амма му ражну женгнаъ хилиъ яракь айи эскрар сагъламвалин пишекрари эвез гъапIну.
Гьарсаб дявдиъ ватанпервер игитар ва хаинкрар шули аьдат ву. Гьарган. Вушра халис игитар гьар вахтна артухъ ву. Коронавирусдихъди вуйи женгну нубатнан ражари му гафар субут гъапIну.
Гьарсар сагъ гъахьи аьзарлу больницйириъ суткйириинди удудучIври, я бегьем нивкI, ясана эрг’вал йивуб дарди, хулан умунвал агьалйирин сагъламвал бадали больницйирин шараитарихъ гьюдюхю сагъламвалин пишекрарин зегьметнан натижа ву.
Хив ЦРБ-йиъ COVID-19-диан аьзарлуйир кьабул апIбаз госпиталь ачмиш гъапIу йигълан мина духтрар дестйириинди йигънура, йишвнура аьзарлуйирин гъуллугънаъ а.
10-пи июнди «Табасарандин нурар» газатдин редакцияйиз душваъ аьхиримжи йицIуд йигъандин муддатнаъ сагъламвал мюгькам гъапIу 14 аьзарлуйирин къуларра алди чпи му гъагъи вирусдихьан сагъ апIбаъ баркаллу зегьмет гъизигу духтрариз чухсагъул мялум апIбан гьякьнаан кагъаз гъафну. Дидин мяна исихъ ачухъ апIурача.
«Гьюрматлу Жамалудин Аьлиевич! Гьюрматлу Хив райондин кIулиъ айи вакилар!
Ич Хив ЦРБ-йиъ ачмиш дапIнайи госпиталиъ коронавирус уьзрихьан сагъламвал мюгькам апIури саки 10 йигътIан артухъ вуйич. Му мани йигъари тялукь палат ва чпи уьзрихьан уьрхбан аьлава СИЗар алахьну гьарсар аьзарлуйихьна хусуси рякъ дабгну, инсанвалиинди, заан дережайиъди ич сагъламвал мюгькам апIбан гъаразнаъди баркаллу зегьмет гъизигу духтрар Тельман Мислимовдиз, Заур Гюльмягьямедовдиз, медсестрийир Ирина Мазатаевайиз, Эльмира Аьлиевайиз, санитаркйир Зумруд Сафарялиевайиз ва Азмина Аразовайиз марцци кIваан чухсагъул мялум апIурача.
Ав, му уьзур гъагъиб ву. Хъа госпиталиъ кIван гьяракатнакан гъапиш, мушваъ йигъар дявдин геренариз тялукь ву пуз шулу. Чпи аьзарлу хьпан хатIа айивализ дилигди, аьзарлуйириз гъуллугъ апIурайи вакилари, дугъриданна, гьунарар улупура. Мициб саягъниинди баркаллуди ляхин апIурайи сагъламвалин пишекрарин зегьметназ лайикь дережайиъди кьимат тувну, дурарин пишекарвалин дережа хъанара за апIбаз дикъат тувуб учвкан ккун апIурача.
Дидихъди сабси му читин вахтна аьзарлу гъахьидарин сагъламвал мюгькам апIбан гъайгъушнаъ духьну, райондин айитI лазим шартIар тешкил гъапIу ЦРБ-йин кIулин духтир Агъамягьямад Нурмягьямедовдиз аьхю чухсагъул мялум апIурача!»
(Аьзарлуйирин къуларра али кагъаз редакцияйиъ а).
Гиппократдин аьгьтназ вафалуйир…
Тельман Кьасумович Мислимов Хив райондин Ляхла гъулаъ бабкан гъахьну. Мектебдин кьяляхъ думу Саратов шагьрин медицинайин институтдин сагъламвалин факультетдик урхуз кучIвну ва 1993-пи йисан гъудуркьу пишекар духьну Хив ЦРБ-йиз ляхниз гъюру. Багъри райондиъ агьалйирин сагъламвал уьбхбан гъаразнаъди педиатрди лихури, дугъан 27 йис ву.
Заур Эльбертович Гюльмягьямедов 1990-пи йисан Ставрополь крайин Кугульта гъулаъ бабкан гъахьну. Дугъан абйир-бабар Хив райондин Асккан Ярак гъулан вакилар ву. Кьяляхъна Заурин абйир-бабари Дербент шагьриъ яшайиш ккабалгуру. 2008-пи йисан Дербентдин 20-пи нумрайин мектеб ккудубкIну, Заур Гюльмягьямедов Астрахандин гьюкуматдин медицинайин академияйик урхуз кучIвру. 2014-2016-пи йисари душваъ «урология» пишекарвал гъадабгъбан метлебниинди ординатурара гъурхну. Жигьил пишекар сифте кьюд йисан Дагъустандин Огни шагьриъ духтурди гъилихну. 2019-пи йисан думу «Земский доктор» метлеблу программайин бинайиинди чан ватан вуйи Хив райондиз гъафну ва гьадму йислан мина ЦРБ-йиъ урологди лихура.
Фунур духтризра ужур медсестра лазим ву
Эльмира Гьяжикьадировна Аьлиева ляхнин заан тажруба айи медсестра ву.
Хиварин уьмуми мектеб ккудубкIбан кьяляхъ дугъу урхбан рякъ Новосибирск шагьрин медучилищейиъ давам апIуру. 1989-пи йисан ужудар аьгъювалариинди думу училище ккудубкIну, жигьил пишекар багъри райондиз хътаркуру. Сифте йисари жигьил медсестра ЧIере, Чювекк гъулариъ медсестради гъилихну. 2000-пи йислан мина ЦРБ-йин терапияйин отделениейин дежурный медсестради лихура. Эльмира Аьлиевайин, агьалйириз кюмекнан хил гьачIабккури, намуслувалиинди сагъламвалин рякъюъ лихури 31 йис ву.
Ирина Аскендаровна Мазатаева 1990-пи йисан Хив райондин ЦIудихъ гъулаъ бабкан гъахьну. Мектебдин кьяляхъ жигьил шуру пишекарвал Астрахань шагьрин медколледждиъ гъадабгъну. 2012-пи йислан мина думу терапияйин отделениейин аьхюну медсестради лихура.
Къайд апIурза: ужур духтир, рягьимлу медсестра кьисмат хьувал аьзарлуйин бахт ву. Яшлуйирикан кми-кмиди «саризра больницана полиция кьисмат дарибшри» кIуру гафар ерхьури шулу. Му гафариз дерин мяна а, вушра уьмур деккучIимриз ухшаруб ву:дидиъ шадвална пашманвал тархьну гъюри аьдат ву. Гьаддиз узуз гъит гьарсар касдиз уьмрин рякъюъ рягьимлу инсанар яракар ишри пуз ккундузуз.
