Гъулаз гъябгъру ужуб рякъ-хул адарш, душваъ яшамиш шулайи агьалйирин уьмрин дережара лап асккануб вуди шулу. Ужудар рякъяр айивали, гъуландарин аьгьваллуваликанси, ерли гьюкмин ляхнин файдалуваликанра хабар тувра.
Аьхиримжи вахтари Табасаран райондин айитI вуйи рякъяризси, федералин эгьемиятнан рякъяр рас апIббазра аьхю фикир тувра. Райондиъ рякъяр рас апIувалин ляхнарикан ич хусуси мухбир Ражаб Нуровдиз «Табасаранское ДЭП №33» АО-йин аьхюну инженер Уьсман Аьлимирзаевди ктибтну.
– «Табасаранское ДЭП №33» АО-йи 2020-пи йисан 1-пи июндиз кIули духнайи республикайин ва райондин мяна айи ляхнариз 6546270 манат харж дапIна. Гьадму гьисабнаан республикайин мяна айи «Дербент-Хючна-Хив» рякъюз – 2500342 манат; республикайин мяна айи «Мамедгъала-Хючна» рякъюз – 929222 манат; республикайин мяна айи «Кавказ»- СиртIич-ТIаттил» рякъюз – 862699 манат; райондин мяна айи 96 км манзил рякъяриз – 2254007 манат. Дидланра савайи, рякъяр дюз алаъбан саб хайлин ляхнар дапIна, асфальтдиъ ахьнайи ичIарра ацIна, жяргъял алабхьнайи рякъярра къайдайиз духна.
– Хъа муниципалин рякъярин гьякьнаан фу пуз шулвухьан? Узуз аьгъюганси, гьамусяаьт бязи гъуларин айитI айи кючйирра къайдайиз хура.
– Табасаран райондиъ гьамусяаьт «Дагъустан Республикайин муниципалин рякъяр» кIуру программа уьмриз кечирмиш апIура. Гьадму программайин дахилнаъди «НЭМА» ООО-йи 2020-пи йисан апрелинна майин вазариъ Табасаран райондин ТIивак гъулан кючйириин асфальт улубзбан ляхнар тамам дапIна. Мисалназ, «Центральный» кючейиъ 4485230 манатдин; «Восточный» кючейиъ – 1397080 манатдин ляхнар кIули духна. Гьамусяаьт Хючна гъулан кючйириинра асфальт улубзбан ляхнар кIули гъягъюра. Уьсмановдин ччвурнахъ хъайи кючейиъ асфальт улубзну ккудубкIну ва 1949460 манат пул харж гъапIну; «Кольцевой» кюче-йиъра асфальт улубзбан ляхнар аьхирихъна гъюра. Му метлебназ 4333750 манат пул деебтна. Хъасин Багъичевдин ччвурнахъ хъайи кючейиъра асфальт улубзбан ляхнарихъ хъюгъиди – дурариз 2388870 манат пул харж апIиди.
«Дагъустан Республикайин муниципалин рякъяр» программайиинди СиртIич гъулаъ Лениндин ччвурнахъ хъайи кючейиъра асфальт дубзуз кка. Му метлебназ 1500610 манат пул харж апIиди.
«НЭМА» ООО-йи, гьаму ляхнарихъди сабси, Хючна-Хьарагъ рякъюн 4-пи километриан 7-пи километриз 2,5 километр манзилнаъ асфальт улубзиди. Думу рякъ Хянгъярин ва Ругжарин кючйиригъян зина гъябгъюрайиб ву.
Райондиъ 1-пи июндиз кIули духнайи вари ляхнариз – 11758430 манат харж дапIна. 2020-пи йисаз жара дапIнайи вари дакьатарин кьадар – 39447944 манат ву.
Мидихъди сабси, саб жерге аьлава ляхнарра тамам дапIнача. Рякъяриз манигъ’вал апIурайи газдин турбйир ва акварин бурузар жара йишварихьинди гьадагъну, асфальт улубзайиз рякъюн зиин али гъумна жяргъялна хяхял гъибикьнайи жар гьязур апIурача.
Ккергънайи ляхнар июлин вазлин аьхириз ккудукIбанди вуча. Федералин программайин «Гъуларин рякъяр» кIуру проектдиинди Мягьячгъала шагьриан дуфнайи «Дорстройтех» ООО-йи Гьесихъ гъулазра рякъ апIура. Думу рякъюн участокдин начальник Хизри Гьябибовдин гафариинди, гьамциб гьяракатниинди ляхин давам гъабхьиш, думу рякъра улупнайи вахтназ улихьна тувуз хьибди.
