Дагъустандиъ коронавирусдин инфекция тарабгъувалихъди аьлакьалу вуди гьюкмин улихь-кIулихь хьайидари дебккнайи ижми къайда яваш апIувал июндин 15-пи йигълан тина ккебгъиди.
Июлин 9-пи йигъан РД-йин Глава Владимир Васильевдин регьберваликкди кIули гъубшу Дагъустан Республикайин аьтрафариин COVID-19 тарабгъувалихъди женг гъабхбан ляхнариз лигру Оперативный штабдин заседаниейиъ региондин муниципалитетарин главйири март вазлин аьхириъ дебкку къайдайиан яваш-явашди удучIвбан теклиф дивну.
Республикайин главайи теклифнан тереф гъибисну, амма дугъу муниципалитетарин кIулиъ айидарикан ижмишнаан Роспотребнадзорин ва Дагъустан Республикайин сагъламвал уьбхбан министерствойин тIалабар тамам апIувал ккун гъапIну.
Мидланра савайи, къайда буш апIайиз имбу вахт республикайин агьалйирихъди тялукь ляхин гъабхбан бадали ишлетмиш дапIну ккуниваликан гъапну.
Ижми къайдайиан удучIвру вахт шубуб йишваз пай дапIна.
Сабпи пай. Сифтена-сифте жюрбежюр алатар масу тувру бицIи туканар ва агьалйирин гъуллугъар гьуркIру йишвар ачмиш апIбанди ву. Эгер тукандин алвер гъахру йишв 400 квадратдин метртIан цIиб ясана гьадму кьадар вуш ва инсанар учIвру йишв жаради ккабалгнаш, тукан ачмиш апIуз ихтияр а. Тукандиз гъюру инсанарин кьадарра гизаф дубхьну ккундар – сар муштарийиз 4 квадратдин метр йишв алабхъруси. Къайда буш апIру сабпи пайнан вахтнаъ гизаф инсанар уч даршлу йишварихь кью-кьюрди лицуз, сейир апIуз хай шулу. Гьацира ачухъ гьавайихь спортдиин машгъул хьузра ихтияр тувди; му ляхнихъ хъайидарин кьадарра саб йишвахь кьюр кастIан артухъ духьну ккундар, ва арайиъ хьуб метр манзил уьбхювал лазим ву.
Кьюбпи пай. Алвер гъахру йишв 800 квадратдин метр вуйи туканар, гьацира кючейиъра алвер гъахру жара йишвар лихуз хъюгъди. Гьаддихъди сабси, туканариз гъюру муштарйирин кьадар аьхюб дархьувалиин зиин гюзчивал гъабхиди, инсанар учIвру хусуси йишвра жаради гъибтувал давам хьибди. Образованиейин бязи идарйир ачмиш апIуз ихтияр тувди.
Шубубпи пай. Аьхиримжи шубубпи пайнаъ вари туканар, агьалйирин гъуллугъар гьуркIру йишвар лихуз хъюгъди. Думуган агьалйирин кьадарнан зиин гюзчивал гъабхидар. Кафе ва ресторанар ачмиш апIиди, амма душвариъ столарин арайиъ варитIан цIиб 1,5 метр манзил дубхьну ясана столарин арайиъ йишв гьадабтIурайи сяняаьт (тахта) ади ккунду. Гостиницйириз ва образованиейин идарйириз ляхин апIуз ихтияр тувди. Думуган рягьятвал гъадабгъру жямяаьтлугъ йишвар, паркар ачмиш апIиди.
Совещаниейиъ удучIвну гъулху Роспотребнадзорин РД-йиъ айи Управлениейин кIулиъ айи Николай Павловди къайд гъапIганси, гъуху ахтармишари республикайиъ айи аьгьвалат къайдайиз гъюз хъюбгърайивал тасдикь апIура. Вушра, бязи районариъ аьгьвалат гъагъиди гъубзра.
Дагъустандин Оперативный штабдин мялуматариинди, 11-пи июндиз республикайиъ вари 6272 кас коронавирусдиан аьзарлу гъахьну. Ккудубшу суткайин арайиъ 97 кас аьзарлуйир ашкар духьна. ТIягъюн ккебгъхъан мина региондиъ 4662 касдин думу уьзур сагъ гъабхьну, 309 кас гъийихну. Гъийин йигъазкьан Дагъустандиъ 109801 кас уьзур кайивализ ахтармиш дапIна, 7219 кас жаради хулариъ гъитна.
Роспотребнадзорин аьхиримжи улупбариинди, йигълан-йигъаз аьзарлу шулайидарин кьадар цIиб шула, уьзур кьяляхъ гъябгъюра.
Вари гьаму вахтнан арайиъ, коронавирус тарабгъувал дебккбан бадали, региондин гьарсар агьалийи жямяаьтлугъ йишвариз гъягъруган машналан маска алдабгъну, хиларилан элгжар илдитну ккундар, инсанарин арайиъ манзил уьбхювал лазим ву.
Ихь уьмур COVID-19 гъювалихъди читин гъабхьну, вушра жвуван ва имбударин сагъвал бадали, духтрарин тIалабар тамам апIурхьа. Учвуз ва ичв багъридариз сагъ’вал туври.
