Мейлан Нежефов
Хив райондин гъуларин аьгьвалат ахтармиш апIури, ич мухбир Мейлан Нежефов, редакцияйин пландиз асас, гъуларин сельсоветарин кIулиъ айидарихъди гюрюшмиш шулу. Гъи газат урхурайидарин дикъатназ дугъан Асккан Ярккарин сельсоветдин кIулиъ айи Гьяжириза Кьулиевдихъди гъабхи сюгьбат адабгъурача.
– Гьяжириза Гъайинбегович, увкан сельсоветдин гьякьнаан уьмуми мялуматар тувуб ккун апIураза.
– Асккан Ярккарин сельсоветдин дахилнаъ Яргълиарин, Зюрдгъярин, Заан Ярккарин ва Сюгют гъулар а. Гьарсаб гъулахъ мал-къара уьбхру ужуб бегьерлу чIур хъа. Гъуларин инсанарра чпин малдарвалин гъиллигъар кади, гьялал зегьметниинди аьшкьлу духьну уьмур хъапIрайи агьалйир ву. Йиз улихьна сельсоветдин главади гъилиху Сиражутдин Сяидовдин варитIан ужударстар ва инсанвалин шартIар давам апIуз кьаст ади, 2023-пи йисан 1-пи ноябрихъанмина главайин вазифйир кIули гъахуз хъюгъюнза.
– Гьаму бицIи вахтнан арайиъ фу дигиш апIуз гъабхьунвухьан?
– Дюз гъапиш, гьелелиг кIулди Асккан Ярккарин гъултIан гъадабгъуз шуладарзухьан. Сабпибди зирзибилин месела гьял гъапIунза. Гъулан гъирагъдихь йишв улупну, убгуз шлуб убгури, хъа кIан’ин гъубзуб ичIаъ абхьри, заълан руг алабхьну сикин апIуз къарар адабгъунча. Гъулан шубуб мягьлайин рякъяриъ хяхял абхьбан, кьялан штун кIулиин расвалин ляхнар ва гьадму кючейиъ урснайи электрик дестегарик йишвандин аквар зигбан ляхнар кIули гъухунча. Заан даграрихъна гъябгъюрайи рякъра уликкна гъабхунча. Гьелбетда, вари гьаму ляхнариъ жямяаьт даягъ шулазуз. Гьаму саягъниинди администрацияйин имбу гъулариъра ляхнар кIули гъахуз гаф тувраза.
– Гъийин йигъаз улупнайи гъулариъ яшамиш шулайи кюлфетарин кьадар фукьан ву?
– Мяишатарин китабдин аьхиримжи бикIбариинди Асккан Яракк 160, Заан Яракк ва Сюгют гъулариъ 30, Яргълиарин гъулаъ 10, хъа Зюрдгъярин гъулаъ 2 хизан дуланмиш шула. Гъуларин аьгьвалат дици харжиб дар. Мисалназ, жара гъулариъси дарди, штун ва рякъюн саб артухъ аьзиятвал ктарчуз.
– Уву гъапиганси, варитIан гизаф инсанар Асккан Яракк дуланмиш шула. Фу апIури шулу ва фит’инди мадар ву гъуландарин?
– Аьхю гафра, я улра дарибшри. Гъи Асккан Ярккарин гъул райондиъ 21-пи аьсрин тIалабариинди варитIан артмиш шулайи гъуларикан саб ву. Гъи ФАП-диъ 3 кас, мялимарра, техперсоналра гъадабгъиган мектебдиъ 50 кас, бицIидарин багъдиъ 13 касди, культурайин хулаъ 3 кас, почтайиъ 2 кас, маларин духтирвалин идарайиъ 3 кас, администрацияйиъ 5 кас, маршрутный таксийиъ 2 кас, гъулан кьялаъ туканар арццну, ариш-вериш’вал гъабхури 3 кас лихура. Гьаму йигъари гъулаъ ариш-веришдин Wildberries кIуру тукан абццну, 2 касдиз ляхин гъабхьну. Гьацира йицIур касдихьнакьан райондиъ жюрбежюр гъуллугъариъ лихура. Мидланра савайи, гъул’ан гъирагъ-бужагъдизди, душну уставалин ляхнар апIури, чпиз кьюб кепек гъазанмиш апIурайидарра цIиб адар.
Гьаддиин шад вузаки, аьхиримжи, вахтари абйирин ругар вуйич кIури, сумчIурилан зиина цIийи хулар тикмиш дапIна. Миди гъулан гележег баркаллуди давам шлубдикан хабар тувра.
– Гъулан жигьиларихъди фициб ляхин гъабхурава?
– Узуз, имбударизси дарди, гъулан жигьиларихъди, агъсакъларихъди гаф-чIал апIуз гьииди вузуз. Фицики 16 йисан мектебдиъ тарихнан ва обществознаниейин дарсар кивру мялимдин тажруба азуз. Асккан ва Заан Яраккарин жигьиларихъди ЦIийи йисаз ва 23-пи феврализ кьюб серенжем кIули духнача. Хъана гьаци аьшкьлуди давамра апIидича.
– Украинайин жилариин гъябгъюрайи хусуси метлеб айи дявдин операцияйиъ гъалибвал багахь апIбак пай киври, ичв администрацийи фициб ляхин гъабхура?
– Гъи гьадму операцияйиъ ич администрацияйиан варждилан зиина кьягьялар иштирак шула. Дурарин арайиъ юкьур кас мобилизацияйин дахилнаъди душнайидарра а: Тимур Вердиев, Альберт Насуров, Амудин Вердиев, Эльдар Бачанов. Юкьридра Асккан Ярккан ву. Гьяйифки, урчIвур кас бинайиинди ич администрацияйиан вуйи баяр, жюрэтлувал улупури, талаф гъахьну: Велибег Ягь’яев, Байрам Ибрагьимпашаев, Замир Мисриханов, Артём Вердиев, Камал ТIаибов, Январь Мягьямедов, Гьяжикьурбан Мягьямедов, Артур Гьюсейнов, Артур Абасов. Ихь гележег бадали чпин жанар фида гъапIу му баяр ухьуз аьсрариинди нумуна вухьуз. Узу кми-кмиди баяр талаф гъахьи вари хизанарихъди гюрюшмиш хьуз, дурарихъди гаф-чIал апIуз чалишмиш шулаза. Гьаци, 23-пи феврализ вахтназ вуди отпускдиз гъафи Амудин Вердиевдиз, Аьбдулкафар Кьулиевдиз ва Юсуф Ибрагьимпашаевдиз гьюрматнан кагъзар тувунза. Магьа гьамус 8-пи Мартдиз дурарин игит дадйириз ва чйириз бахш дапIнайи серенжем планламиш дапIназа.
– Ихь сюгьбатнан аьхириъ фу пуз ккундувуз?
– Халкь яснаъ а. Гъит дюн’яйиъ ислягьвал ибшри. Ихь баяр сагъ-саламатди багъридарихьна хъадакну гъюри. Гьарсаб хизандиз хушбахтвал ккун апIураза. Имбуб вари апIуз ухь’ан удукьиди.
