Зубайдат Шябанова

Гьаму йигъари Табасаран райондин глава Мягьямед Къурбанов Мягьячгъала шагьриъ айи табасарандин халкьдин агьли касарин советдин вакиларихъди гюрюшмиш гъахьну ва райондин юбилейихьна гьязур хьпан меселйириз гъилигну.

Гюрюшдиъ тарихдин илмарин доктор, профессор Мягьямед Гьясанов, экономикайин илмарин доктор, профессор, МГУ-йин мялим Зейдулла Юзбегов, табасаран халкьдин агьли касарин Советдин председатель Исамудин Рамазанов иштирак гъахьну.

Табасаран район арайиз гъафихъанмина цци 95 йис шула. Гьаддихъди аьлакьалу вуди юбилейин серенжемар сентябрин вазли гъахуз планламиш дапIна. Дидихьна гьязур хьпан ляхнар гьамустIан ккергъна. Юбилейин тешкиллувалин комитетдин дахилнаъ РД-йин Правительствойин вакилар, РД-йин Халкьдин Собраниейин депутатар, райондин администрацияйин гъуллугъчйир, илмарин ва яратмишарин циркларин интеллигенция ва гьацира жямяаьтлугъ касар а.

Мидланра гъайри, Табасаран райондин пайдагъ, гимндин текст ва дидихьна мукьам гьязур апIбаан конкурсар гьяракатнаъ а.
«Юбилейин машквраз республикайин хайлин районариан ва уьлкейин гизаф регионариан хялар гъиди. Ихь метлеб – думу серенжемар варидарин кIваин гъузруганси, заан дережайиъди тешкил апIуб ва гъахуб вуйихь», – гъапну Мягьямед Къурбановди.

Дугъу гьацира уч духьнайидариз юбилейиз гьязур апIурайи китабдин макет улупну. Китабдин сабпи пайнаъ райондин яшайишдинна экономикайин артмиш’валикан ктибтура, хъа кьюбпи пайнаъ – тарихдикан, аьдатарикан ва культурайикан мялуматар чап апIиди.
Райондин кIулиъ айири гъапиганси, багарихьди юбилейин оргкомитетдин заседание шиди. Душваъ агьли касарин фикрарра гьисабназ гъадагъну, юбилейин серенжемарин план тартиб апIиди.