Наргиз Гюлечова
Магьа, хъади-хъади швнуд йисандин арайиъ республикайин экономика «сирниккан» ккадабгъбан ляхин Дагъустандин Глава Сергей Меликовдин гюзчиваликкди гъябгъюра. Натижйирра ужудар вуйиб рябкъюрахьуз. Гьар йисан республикайин муниципалитетариъ дилаварчивал апIури, налогар тутруврайи касар гьисабназ гъадагъури, дурар учетдиъ тIаъра.
Улихьна йигъари Дагъустандин Правительствойин председателин заместитель Аьбдурягьман Мягьмудовдин регьберваликкди гьаму темайиз бахш дапIнайи заседание кIули гъубшну. Думу заседаниейиъ Дагъустандин зегьметнанна яшайишдин артмиш’валин министр Мягьямедзагид Кихасуровди, гьаму йисан эвелариан майдин аьхираризкьан 13 агъзурихьнакьан касар «сирниккан» ккадаъну, налогарин гьисабназ гъадагъну кIури, мялумат тувну ва му ляхин давам шулайиваликанра гъапну
Заседаниейиъ республикайин вице-премьери му месэла гьял апIбаъ иштирак духьну ккуни пишекрарин асас вазифйириканна, лазим вуйи къайдайиинди ляхин дарапIрайи ва тамам гъапIу ляхнихъан гьякь-гьисаб дурубхрайи муниципалитетариканра мялуматар тувну.
Аьбдурягьман Мягьмудовдин гафариинди, 2025-пи йисан 1-пи январиз вуйи улупбариинди, республикайиъ саки 30 агъзурихьнакьан агьалйири чпин бизнес «сирниккди» гъабхура. Му ляхин къайдайиз хпан бадали, Дагъустандин аьтрафар зонйириз жара дапIну, душвариъ ахтармиш’валар гъахру комиссияйин членари ляхин апIура. Гъийин йигъаз думу комиссияйин вакилари республикайиъ ариш-веришчивал гъабхурайи саки 16 агъзурихьнакьан объектар ахтармиш дапIна. Ахтармишар гъахбан серенжемарин натижайиъ 3 658 объект налоговый гьисабназ гъадагъну, 9 230 объектдиина протоколар гъидикIну ва 1532 объектдихъди ляхин апIуз ихтияр туврайи йикьрар гъийитIну.
«Ав, республикайин саспи муниципалитетариъ му ляхин ужуди гъябгъюра. Гьадрарин арайиъ Кьибла Сухокумск шагьурра а. Хъа вушра, аьгьвалат читинди гъубзнайи муниципалитетарра цIиб дар. Цци ухьухьна гъюрайи туристарин кьадар улихьна йисаритIан хъанара артухъ шулайивализ лигну, гъулар-шагьрариз гъюрайи хялариз масу туврайи мутмуйихъ пул карточкайиинди читинвал адарди тувру мумкинвалар айи шараитарихъди тямин апIуб чарасуз ву. Гьаддихъди сабси, гьарсаб бизнесдин объектди гъабхурайи ляхин къанундиинди тамам дапIну ккунивалра ашкар шула», – гъапну Аьбдурягьман Мягьмудовди.
Заседание аьхири, РД-йин Правительствойин председателин заместители, уч духьнайи комиссияйин членарихьна илтIикIну, бизнес «сирниккан» ккадабгъбаъ аьгьвалат, читинди гъубзнайи муниципалитетариз гъягъюб ккун гъапIну.
