Наргиз Гюлечова
29-пи октябри] Мягьячгъалайин «Уйташ» аэропортдиъ гъахьи пис гьядисйирихъди аьлакьалу вуйи чпин фикрар ачухъ апIурайи касарин кьадар йигълан-йигъаз артухъ шула. Гъи узуз Украинайин хусуси метлеб айи дявдин операцияйиъ уьмрин юлдаш кешмиш гъахьи ачIни дишагьли Асият Абакаровайин фикрар тувуз ккундузуз.
«Палестинайин гьядисйир ккергъу йигъари, йиз фикриз дишлади хусуси метлеб айи дявдин операцияйин гьядисйир гъафниз. Думуган ихь агьалйири гьарури кIуйи: «Гьаз ву му дяви? Гьаз ихь гьюкумат »Украинайиин алабхьну?»». Сабпи йигъариланмина думу дявдин операцияйиъ йиз жилирра иштирак гъахьнийи. Мицдар гафар, иллагьки жвуван мирасарикан, багахьлуйирикан ебхьували, дюзди кIуруш, гизаф дерд тувуйзуз.
ЦIиб вахтналан, йиз жилир женгариъ кубкIу, сагъ апIуз даршлу гъагъи зийнариан кечмиш хьпан кьяляхъра, гьятта саламдиъ дуснайи жиларира кмиди «ихь жигьилари чпин жанар гьавайиди фида апIура» кIуру гафар ерхьруган, узу йиз ибариин хилар иливури, дицдар сюгьбатарихьан гьудучIвури шуйза. Аммаки, чпи бадали, Ватан бадали, ислягьвал бадали, ихь жигьилари чпин жанар фида апIурайивалиан гьич сарризра гъавриъ хьуз ккундайи! Гьяйифки, гьич саризра дурарин тереф бисуз ккундайи. Гьятта Ватан уьбхюрайи ихь жигьилариз кяфирар ву кIурударин кьадарра цIиб дайи.
Магьа гьамус Палестинайиъ гьаму гьядисйир ккергъиган, Украинайин аьтрафариин гъябгъюрайи хусуси метлеб айи дявдин операцияйиъ иштирак шули, ислягьвал бадали, Ватан уьбхбан буржи тамам апIурайи мусурман чвйириз кяфирар кIурайидар вари, гъи Палестинайиъ айи мусурман чвйир ва чйириз хурайи аьрвалариз аькси вуди удучIвна. Ватан уьбхюри, чпин жанар фида гъапIу жвуван республикайин жигьилариз кяфирар кIури, хъа жара уьлкейиндарин тереф уьбхюри, гьамцдар къанунсузвалар апIурайивалиан, дюзди кIуруш, цIиб гиранра дубхьназуз. Ваъ, ваъ, узу кIуразарда, душваъ шулайибдиин рази вуза, кIури. Гьадраризси сабси, узузра лап аьхю дерд шулайиз Палестинайин бицIидариина, дишагьлийириина хурайи аьрваларикан, дурар йихурайиваликан. Аммаки кIурайиб гьадму вуйизки, гьаз гьич сар каскьан хусуси метлеб айи дявдин операцияйиъ гъийиху ихь чвйир бадали, дурарин гьюрмат уьбхюри, митингдиз удучIвундар?
Аьсрариинди хайлин миллетар чвйирси сатIиди яшамиш шулайи Дагъустандин агьалйир, гъи республикайин аэропордиъ Тель-Авивдиан гъафи, жвуван республикайин агьалйир айи самолетдиин алархьувал – му аьхю аьйибнан ляхин ву. Шли-вуш, фу-вуш гъапну кIури, гьарурихъ хъебехъну, мицдар дюшюшар арайиз хуз, ухьу бицIидар сарра дархьа. Гьаз гъи ихь гьаммишан хялар кьабул апIиинди адлу вуйи республика му жюрейиинди вари уьлкейиз биябур гъабхьну? Йиз фикриан, гьарурин чпин хул’ан ккебгъну, мектеб, университет гъадабгъну, жигьиларихъди тербияйин ляхин гъабхуб чарасуз ву», – аьлава гъапIну Асият Абакаровайи
