Наргиз Гюлечова
Декабрин вазлин эвеларианмина ихь республикайиъ яман микIар хъивбан дюшюшар гизаф духьна. Гьаддихъди аьлакьалу вуди, Мягьячгъалайиъ ва жара шагьрариъ, 25-тIан артухъ районариъра аквар ктIушвувалин дюшюшар гъахьну. Гьамдин гьякьнаан Дагъустандин энергетикайинна тарифарин министр Марат Шихялиевдин, «Россети Северный Кавказ» – «Дагэнерго» ПАО-йин Дагъустандин филиалин директорин вазифйир вахтназ вуди тамам апIурайи Арсен Гьяжиевдин ва гьадму филиалин кIулин инженер Сяид Султановдин республикайин журналистарихъди пресс-конференция гъабхьну.
Пресс-конференция ачмиш апIури министри гъапиганси, гъийин йигъан республикайин энергетикайин гъурулуш, гьяйифки, табиаьтдин гьавйирилан гизаф ассиллу ву. Янаки, микI хъивубси, аьхю мархь, йиф убгъуз хъюбгъюбси, аквар ктIушвура. Хъа 13-15-пи декабрин йигъар, яман микIар хъивну, гьавйирра мичIал духьну, лап аьхъюдар вуйи. Амма, айи аьхъюшназ, симар даргъну, мирккар йивнайивализ зат дилигди, «Россети Северный Кавказ» – «Дагэнерго» ПАО-йин пишекрари чпин вазифа тамам апIури, агьалйириз аквар вахтниинди хъирчбан бадали, хайлин ляхин гъизигну.
«МикIар хъивбакан ва ахъюшнар апIрубдикан, вахт ккимиди Гидрометцентриан мялумат дуфну айчуз. Гьаддиз, «Дагэнергойиан» вуйи гъарашугъарихъди сатIиди, му жюрейин дюшюшар, янаки аквар ктIушвбар арайиз гъювалин гъавриъ ади, гъаразнаъ ади гъахьунча. Чпин терефнаан дурари табиаьтдин пис гьавйирихьна гьязур хьувалин къайда заан дережайиъди гьязурди дебкканайи. Гьаддиз, «Россети» компанияйин гъунши регионарин бригадйириз дих дарапIди, электроэнергияйин линйириъ аварйир духьну, аквар ктIушвбахъди агьалйириз алахьу читинвалар «Дагэнергойин» пишекрари пландиинди улупнайи вахттIан ухдисира кади арайиан адагъну», – гъапну Марат Шихялиевди.
Чан нубатнаъ «Россети Северный Кавказ» – «Дагэнерго» ПАО-йин филиалин кIулин инженер Сяид Султановди гъапиганси, МЧС-диан гьавйир дигиш шулайивалин мялумат гъафибси, дурар чпин терефнаан дишлади гьязур гъахьну. Арайиз гъафи читин дюшюшар терг апIбан бадали, лазим вуйи техникара, пишекрарра гьяракатниинди гьязур гъапIнийи.
«13-пи декабрин йишвандин сяаьт йицIубдихъанмина ккебгъну, 110 ва 35 кВт дережайин аквар ктIушвурайивалин гьякьнаан зенгар гъюз хъюгънийи. Хъа гвачIниндин сяаьт 6-диан ккебгъну, гьяракатниинди ляхин апIбан къайда дебккунча ва, гьадму вахтназ айи читинвалар терг апIбан бадали, вари бригадйири ляхин апIуз хъюгънийи. Му ляхниз 92 аьдад техникайихъди 276 касдикан ибарат вуйи 92 бригада жалб гъапIну. Пуз ккундузузки, читинвалар арайиз гъюбан, янаки агьалйир аквар адарди гъузбан варитIан асас себеб, хайлин йисарин арайиъ гьюдюдюхри, йирси духьнайи симар яман микIлу ва аязну хъдутIувал ву.
Мидланра гъайри, читинвалар арайиз духнайи дюшюшар терг апIруган, эгер учуз хъанара артухъ кюмек ккун гъабхьиш кIури, министерствойиан кюмек апIбан бадали, республикайин энергетикайин министерствойихъди региондин штабдиъ заседаниера кIули гъубхунча. Амма кюмек лазим гъабхьундайи», – гъапнийи Сяид Султановди.
Арсен Гьяжиевди туву мялуматариинди, «Россети Северный Кавказ» – «Дагэнерго» ПАО-йин филиалин пишекрар, аквар ктIушвувалин дюшюшар терг апIбан ляхнихъди сабси, республикайин агьалйирихъди аьлакьайиъра ади шула. Фицики, му жюрейин читинвалар арайиз гъафиган, аьрзйир кьабул апIру республикайин жюрбежюр идарйириз, арайиз дуфнайи читинваларикан мулумат туври, агьалйир илтIикIура. «Гьаддиз узу, республикайин шагьрар-районарин агьалйирихьна илтIикну, дурарикан аьгьвалат читинуб вуйиб ва пишекрари наан ва фици ляхин апIураш гъавриъ хьуб ккун апIураза. Гьаз гъапиш саспиган дурари лап читин гьялнаъ айи йишвариъ яман аязнаккди миркк йивнайи симар къайдайиз хура. Хъа хулаъ дуснайи касди, гьациб читин вазиятнаълихурайи пишекрарикан фикир дапIну, цIиб сабур апIури ккунду», – аьлава гъапIнийи Арсен Гьяжиевди.
