Умгьанат Сулейманова
Жвуван юрдарин жигьиларикан ужудар хабрар, фунур касра рази шулу. Бургьанкент гъулан агьалйирин хъуркьуваларикан ебхьруган гьаму гьиссарихьди йиз юкIвра абцIри шулиз.
Хусуси метлеб айи дявдин операцияйиъ иштирак шулайи Бургьанкент гъулан жигьиларин игитваларикан кми-кмиди жюрбежюр сайтариъ мялуматар рякъюри шулзуз. СВО-йиъ ва дявдин жара гьяракатариъ жвуван халкь ва Ватан бадали намуслувалиинди эскервалин буржи тамам апIбаз лигну, хайлин йиз гъуландар медаларихъди лишанлу дапIна. Гъи газатдин машариъ гьадрарин жергейиан вуйи кьюр игитрикан ктибтуз ккундузуз.
Кюребегов Роман Къазимягья-медович 1981-пи йисан Бургьанкент гъулаъ аьхю хизандиъ бабкан гъахьну. 1998-пи йисан мектеб ккудубкIну, дугъу кьюд йисан Урусатдин армия-йин жергйириъ Пенза шагьриъ ерлешмиш дубхьнайи эскервалин частнаъ гъуллугъ гъапIну. 2007-пи йисан 24-пи июлиъ Чечен Республикайин Урус-Мартан шагьриъ айи эскервалин частарикан сабдиъ дугъу военный контракт гъийибтIну, хъа 2008-пи йисан, Ростовдиъ ерлемиш дубхьнайи прапорщикарин мектебдиъ урхуз учIвну, аьхюну прапорщикдин звание гъазанмиш апIуру.
Роман Кюребегов Жуковдин медалиинди лишанлу дапIна.
Аьбдулялиев Эдгард Аьбдулха-ликьович 1988-пи йисан Бургьанкент гъулаъ аьхю хизандиъ бабкан гъахьну. Багъри гъулан кьялан мектеб ккудубкIиган, думу, бязи баяр-шубарси, фу ляхин эйси шулуш, фикрарикк ккахъундайи. Мектебдиъ урхури имидитIан жвуван Ватан уьбхрурин пише ктабгъу Эдгард 2007-пи йисан чан хушниинди армияйиз гъушнийи ва Владимирский областдиъ эскервалин гъуллугъ тамам гъапIнийи. Саб бицIи вахтналан думу Краснодарский крайдин Кропоткино шагьриз военный частназ гьаъру, ва душваъ Эдгарди, военный контракт йибтIну, 15 йисан гъуллугъ апIуру. Дупну ккундуки, хусуси метлеб айи дявдин операция ккебгъу йигъланмина думу Украинайин аьтрафариин гъягъюрайин женгариъ иштирак шула. Гъи сержант Эдгард Аьбдулялиев отделениейин командир ву. Думу Суворовдин медалиинди лишанлу дапIна.
Гьаму багарихьди саб-кьюб гьяфтайиз отпускдиз дуфнайи Романдихъди ва Эдгарддихъди гюрюшмиш гъахьунза. Ич сюгьбатнаъ дурари, асас вуди, хусуси метлеб айи дявдин операция фици ккебгънуш ва чпиз сабпи йигъари фицдар читинвалар алахьнуш, хъайи-хъайибси ктибтнийи.
– Гьяйифки, Украинайиъ гизаф ихь жигьилар ва ислягь инсанар гъийихну. Учухъди гъуллугъ апIурайи эскрарин арайиъ, яракь хилиз гъадабгъну, душман вушра, инсандиин яракь алапIну, йивуз даршлудар гизаф айи. Гьадму садпи вазариъ женгар гъахуз думукьан гьязурлугъвал адру ихь жигьил эскрариз, учу йивну йихуз метлеб айи, харижи уьлкйириъ гьязур дапIнайи нацистарихъди дяви гъабхуз читинди алабхъну. Гьаци вушра, ихь жигьил баяр, дявдин гьяракатариъ чпин эскервалин буржи тамам апIури, аьхиризкьан Ватандин улихь чпи туву аьгьтназ вафалуди гъузну. Гьяйифки, гизафдар гъийихнура ву.
Му спецоперацияйиъ лап гъагъи, гьял апIуз даршлу дюшюшарра алахьунчуз. Учухъди саб частнаъ гъуллугъ апIури гъахьи, швнуд йисари таниш вуйи хайлин ич юлдшарихь гмягьрум гъахьунча. Гьамусяаьт, ухьуз аьгъюганси, хайлин шагьрар азад дапIну, душвариъ дуланмиш шулайи агьалйир ислягь уьмрихьна дуфна, пуз шулу. Гьаци вушра нацистарин гьяракатар яваш шуладар. Дурариз, хъанара кьяляхъ дуфну, чпин терс метлебар тамам апIуз ккунди а.
Баб аьгъю касдиз Ватанра аьгъяди ккунду, гъи ич вазифара ихь баб-Ватан аьхиризкьан уьбхюб вуйич, – гъапнийи Романди ва Эдгарди.
Му кьюрид жигьилариз дявдин гьядисйир кIваин хуз думукьан рягьятди дайи. Дурариз йиз суалари ва чпин кIваин апIбари дерд туврайиб мялум шуйи. Гьаци вуйиган, артухъ суалар тувундарча. Эскрарин гафариинди, дурарин мухрарик кайи медаларра думукьан рягьятди гъазанмиш гъапIдар дар. Дурар Ватанди чпин улихь диву табшуругъар намуслувалиинди, жвуван жандилан хил алдабгъну тамам апIбаз лигну, тувнайидар ву.
Спецоперацияйиъ иштирак шулайи мицисдар жюрэтлу жигьилар Бургьанкент гъулан тамам гьарсаб хул’ан а. Дурарикан гизафдарихъди гьелелиг аьлакьайиз удучIвуз гъабхьундарзухьан. Вахт гъабхьиган, дурарихъди гьарсарихъди гаф-чIал апIуз узуз кьисмат шул кIури, аьхю умуд кайиз.
