Наргиз Гюлечова

2024-пи йисан республикайиъ, 1 миллиардна 700 миллион манат харж дапIну, гъулан мяишатдин жиларин мянфяаьтлувал за апIбан проектар уьмриз кечирмиш апIиди. Мидин гьякьнаан республикайин гъулан мяишатдин ва ипIру-убхъру сурсатарин министерствойин пресс-гъуллугънаан хабар тувра.

 

Къайд апIуб лазим вуки, Дагъустан Республикайи, региондиъ цIийи хутIлар ляхник кирчбан ва дурар мянфяаьтлувал апIбан гьякьнаан 117 проект гьязур дапIну, Урусатдин гъулан мяишатдин министерствойиз хъадаъну. РД-йин гъулан мяишатдин ва ипIру-убхъру сурсатарин министерствойиан тувнайи мялуматариинди, гьаму йисан республикайиъ жиларин мянфяаьтлувал за апIбан цирклиъ, 840 миллион манат харж дапIну, 7 агъзур гектар хутIлар штухъди тямин апIбан бадали, 56 проект уьмриз кечирмиш дапIна.

Мидланра гъайри, аьхиримжи 3 йисандин арайиъ, Дагъустандиъ 2 миллиард манат пул харж дапIну, хутIлар штухъди тямин апIбан проектар кIулиз адагъура. Гьадму ляхин тамам апIбан бадали 25 агъзур гектарин хутIлариъ мягьсулар ва мейвйир цIийикIултIан урзуз хъюгъна, лихури айи 12,6 агъзур гектар хутIлар цIийи алаъна. Дидланра савайи, дюгю гьясил апIуз кюмек тувру цIийи инженервалин гъурулушра тикмиш дапIна.