Гюльнара Мягьямедова

Мягьячгъалайиъ Дагъустандин гьюкуматдин технический университетдин бинайиин военный урхбан центр ачмиш апIиди. Думу центри, 2024-пи йисан сентябрилан башламиш дапIну, урхрудар кьабул апIбанди ву. Дидин гьякьнаан университетдин тербияйин ляхин гъабхру проректорин вазифйир тамам апIурайи Тамила Рягьимовайи мялумат тувну.

 

«Советарин Союздин девриъ вузарин бинайиинди военный гъуллугъчйир гьязур апIбан бадали, военный кафедрйир яркьуди ишлетмиш апIури гъахьну. Ич вуздиъ думу цIийиди гъабхуз хъюгъю ляхин ву. Гьамусдин девриъ дявдин женгар асас вуди техникайиинди гъахурайивализ дилигну, ич вуздиъ эскервалин урхбан центр ачмиш апIувалин гъавриъ ача. Гьамусяаьт эскервалин урхбан центриз жара дапIнайи дарамат цIийи алапIну, материалинна техникайин бина албагну ккудубкIура», – гъапнийи Тамила Рягьимовайи.

Центр арайиз хувал РФ-дин оборонайин министерствойин дахилнаъ а. «Эскервалин урхбан центрин кIулиъ айир ва военный хусуси метлеб айи дарсар киврудар Урусатдин Федерацияйин яракьлу кьувватарин гъуллугъчйир хьиди», – гъапнийи проректори.

Центр тешкил апIбан бадали, университетди саб корпус жара гъапIну. Думу дарамат рас апIбаз ва материаларинна техникайин бинайин артмиш’вализ 15 миллион манат харж гъапIну. Гъюру йисан сентябрин вазлиъ центри университетдин студентарикан 100 кас кьабул апIиди, дурариз, чпин асас пишейилан савайи, военный звание ва военный пише гъадабгъуз мумкинвал хьибди. Студентар конкурсдин бинайиинди кьабул апIиди. Конкурсдиъ ццийин ва гъубшу йисан бакалавриатдин ва специалитетдин программйириинди урхуз кучIву студентарихьан иштирак хьуз шулу. Гележегдиъ центр региондинубдиз илтIибкIбанди ву, дина республикайин жара вузариъ урхурайидарра кьабул апIиди.