Феруза Рамалданова
Хиварин Гъалибвалин паркдиъ 3-пи сентябри терроризмдин терефкрарин инсафсузваликк ккахьу ватандашарин гьюрматназ тешкил дапIнайи яснан митинг кIули гъубшну. 

Террористарин пис гьяракатариз аьксивал улупури, пашманвалин митингдиз райондин глава Ярмет Ярметов кIулиъ ади, ерли администрацияйин ва къанун-къайда уьбхру гъуллугънан вакилар, Хив ва Агъул районарин военный комиссар Сулейман Гьюсейнов, Хиварин уьмуми мектебдиъ урхурайидар, мялимар ва жямяаьтлугъ уч гъахьну.
Ватандин Аьхю дявдиъ душмандихъди вуйи женгариъ чпин жанар фида гъапIу кьягьяларин гьюрматназ паркдиъ тикмиш дапIнайи «Лизи кьарнйир» ядигарихъ Урусатдин гимндиккди кюкйир диври, митинг ачмиш гъапIну.
Серенжемдин иштиракчйирихьна илтIикIури, Хив райондин глава Ярмет Ярметовди гъапну:

 
– Гьяйифки, аьхиримжи 25 йисандин муддатнаъ «терроризм» гаф саки бицIиризра кмиди мялум гъабхьну. Думу уьлкейиъ гьадму саб вахтна арайиз гъафи гъибикьуваларин натижа гъабхьну.

 
Гъи ухькан гьарсар террористар Беслан шагьрин мектебдиин вягьшивалиинди алархьбан натижайиъ арайиз гъафи пашман гьядисйирин шагьидар духьну, магьа 22 йис ву. 2004-пи йисан 3-пи сентябри аку ниятари-инди мектебдиз гъафи баяр-шубариз, абйир-бабариз, мялимариз гъядябхъю завална зулум инсаниятдиз аьхир адру пашман «машквраз» илтIибкIну. Бесландин мектеб террористари гъибисган саб жюрейинра тахсир ктру живанар уьмрихъ мягьрум гъахьи йигъар, фукьан йисар гъушишра, жямяаьтлугъдин кIваълан дурушур! Вахтар гъягъюра, йисари думу завал ухьхьан ярхла апIура, амма сагъу кьувватарин фагьмиан думу пис гьядисйир, уьмрар кьатI гъахьи набалугъарин суратар сабдихьанра кутIушвуз удукьидар. Дурарикан вуйи марцци фикрар гьаргандиз наслариз даимлу ву – илимдихьна вуйи аку гьякалси, душмандин улихь кIул ис дарапIу игитвалси.

 
Террористаринна экстремистрарин иштирак’валиинди уьлкейин жюрбежюр пIипIариъ арайиз гъафи ва гьелелиг аьхир дивуз дубхьну адру къурхулу гьяракатарин шагьидар шулайиган, сарихьанра мидиз архаинди лигуз шулдар. Хъа 2022-пи йислан башламиш дапIну, ихь игитари Украинайин аьтрафариин гъябгъюрайи хусуси метлеб айи дявдин операцияйиъ Урусатдин маракьар уьрхбан бадали, му саягъ кьягьялвал улупурайиган, йишвариин ухькан гьарсар гафниинди, жвувхьан шлу ляхниинди дурариз кюмек тувуз буржлу ву. Тялукь гьядисйир пакди кIваин уьрхюри, ухьу наслариз ислягь гележег яратмиш апIбан метлебниинди вари мумкинвалар сарф апIбаз дерин мяна а.
Террористарин, нацистарин пис гьяракатаринна ниятарин натижайиъ арайиз гъафи пашман дюшюшарикан сикин дарди улхуз шулу. Гьякьикьатди субут апIурайиси, ихь веледарин гележег ихь хилиъ а. Ухьу думу пис хаинкрарин идеологияйиз аьксивал улупну ккунду. СатIивал сабанра ккабгъуз шлуб дар, – аьлава гъапIну Ярметовди.
Пашманвалин митингдиин, террористарин пис ниятар тянкьид апIури, райондин «Сарпидарин» жергйириан живанари шиърар гъурхну.

Шиклиъ: Митингдин геренар.