Гюльнара Мягьямедова
Урусатдиъ 27-пи сентябриъ тербиячийин ва мектебдиз улихьна тувру образованиейин цирклин гъуллугъчйирин йигъ къайд апIура.
«Табасарандин нурар» газатдин машариъ гьар йисан бицIидарин багъариъ лихурайидарикан бикIури шулу. Гьаму ражари узу тербиячийин йигъ улубкьбахъди аьлакьалу вуди, Халагъ гъулан бицIидарин багъдин заведующий Къяяханум Пировайихьна илтIикIунза.
Къяяханум Пирова Халгъарин бицIидарин багъ тешкил гъапIу йигъхъанмина душваъ заведующий вуди лихурайи, гьарсаб ляхнин гъавриъ айи, саламат хасият хъайи лайикьлу дишагьлиси таниш вузуз. Дугъхьан бицIидарин багъдин ляхникан, чаз алахьурайи читинваларикан, гьамусдин деврин бицIидариз тербия тувбакан, тазади лихуз дуфнайи тербиячйириз вуйи насигьятарикан ктибтувал ккун гъапIунза. Дугъу йиз суалариз жаваб вуди, жикъиди гъапнийи: «Гьарсаб ляхниъ чан читинвалар шулу. Гьелбетда, шагьрариъси дарди, гъуларин бицIидарин багъдиъ лихуз, саб терефнаан, рягьятди ву (бицIидарин кьадар цIиб ву), тмунуб терефнан читиндира ву. Хъа учу бицIидарин багъдиъ лихурайи тербиячйирин кюмекниинди вари читинвалариан кIул адабгъурача.
Гьаму машкврин йигъан узу, бицIидарин багъариъ лихурайи тербиячйир пишекарвалин йигъахъди тебрик апIури, дурариз жандин мюгькам сагъвал, ляхниъ хъуркьувалар, хизандиъ мясляаьт, хушбахтлу уьмур ккун апIураза. Хъа Халагъ гъулан бицIидарин багъдиъ гизаф йисари лихурайи тербиячи Асли Ражабовайикан газатдин машнаъ макьала тувнийиш ккундийзуз», – тIалаб гъапIнийи Къяяханум Пировайи.
Асли Ражабова 1981-пи йисан Хив райондин ВертIил гъулаъ бабкан гъахьну. Мектеб ккудубкIбан кьяляхъ, дугъу ДГПУ-йин Дербентдиъ айи филиалиъ ккергъбан классарин факультетдиъ образование гъадабгъну. Бухьнагъ гъул’ан вуйи Мягьмуд Ражабовдихъди хизан ккебгъну, Асли 2005-пи йисхъанмина Халгъарин бицIидарин багъдиъ лихура.
«Ич бицIидарин багъдиз Халагъ, Бухьнагъ, Гуми, Жвулли, Афна гъулариан 50 бицIир гъюра. Дурар кьюб дестейиз жара дапIнайич. БицIидар гвачIнинган абйир-бабари хъади гъюру. Дурар кьабул дапIну ккудубкIбан кьяляхъ зарядка апIурача ва сяаьт 9-диъ бицIидариз гвачIниндин хураг гьиврача. ИпIруб дирипIру бицIидариз уччвудар гафар апIури, ипIруб туври шулча. Хъасин бицIидариз варитIан ккуни ляхнихъ – тамшйир апIбахъ хъюгърача. БицIидариз шиклар зигуз, гъизигу шиклар рангарихьди арцIуз, убрушвихъди ляхин апIуз улупури шулча.
Дюзди гъапиш, вари бицIидар учухьна аьхю аьшкьниинди гъюри шулу. Гьамус гъулариъра хизанариъ гизаф бицIидар адар. БицIидариз хулаъ тIагъру шулу. Дурарихъди тамшир апIуз дадйиризра вахт шуладар. Хъа бязи вахтари, багъдиз гъюру бицIидар сабпи ражари таниш дару тербиячйирихъди гъузруган, ишру вахтарра шулу. Думуган бицIир ккарцру, гьар жюрейин тамшйир апIури шулча. Дугъахьна жюрбежюр уюнжагъар туври, тамшир апIури, бицIирин хъугъвал гъазанмиш апIури, дурариз чпин таярин арайиъ албагну яшамиш хьуз улупурача.
БицIидарихъди гьар машквриз утренникарра гъахурача. Дурар утренникариз разивалиинди гьязур шулу. Машквриз улихьна абйир-бабариз теклиф апIури, дурариз бицIидарихъди гьязур дапIнайи ялхъвнар, мяълийир, сягьнийир улупурача.
Узузра шубур велед азуз, узуз дурар фици ккундуш, гьарсар абайизна бабаз чпин веледарра гьаци ккунду. Гьаддин гъавриъ ади, ляхин апIуз чалишмиш шулаза.
Йиз ляхин гизаф кьабулди вузуз. БицIиди имиди учухьна багъдиз гъафидариз, аьхю гъахьиганра учу гьархрадар. Дурар гъяркъиган, жвуван багъридар гъяркъиганси юкIв шад шулу, фицики узу дурарин тербияйик пай кивунза, дурариз жвуван кIван манишин туври гъилихунза. БицIидариз чпиз гъапIу уж’вал кIваинди гъубзру. Гьаму улихьнаси 8-пи классдиъ айи баяр-шубар узухьна машквар мубарак апIури, кюкйирра хьади гъафнийи», – гъапнийи ич сюгьбатнаъ Асли Ражабовайи.
Къайд апIуб лазим вуки, тербиячи – му читин ва жавабдар пише ву. Чав тербия туврайи бицIидар кIвантIарик инчI кади, дадайиси мани хилар гьачIарккну кьабул апIурайи инсандикан ужудар гафартIан пуз шулдар. Дицир касдихьна бицIидар аьхю аьшкьниинди гъяггъюру. Жвув’ина аманат дапIнайи жарарин веледдихъан жвуванурихъантIан артухъ юкIв убгуру. БицIидарихьна вуйи ккунивали, бицIириз хъайивал апIуз аьгъювали, бицIирин гъавриъ ахъували, бицIириз ужубна харжиб аьгъю апIуз улупували тербиячи жара инсанарихьан тафавутлу апIура. Думу пишейи кIван жумартвал, сабурлувал, ужуб гележегдик умуд кади ляхин апIувал тIалаб апIура.
Къяяханум Пирова кIулиъ айи Халагъ гъулан бицIидарин багъдин вари коллектив тербиячийин йигъахъди тебрик апIури, дурариз ляхниъ хъана заан хъуркьувалар ккун апIураза.
