Феруза Рамалданова

Гьаму йигъари Хив райондин Хиварин спорткомплексдиъ «БицIир мектебдиз гьязур апIин» лишниккди тялукь акция кIули гъубшну.

Серенжем Хив райондин «Сарпидарин» жягьтлувалиинди ва «Мороженоейин фабрика» дилаварчивалин тешкилатдин кIулиъ айи ихь ватанагьли Баллакерим Мягьямадовдин кюмекниинди кIули гъубхну.
Акцияйиз хусуси метлеб айи дявдин операцияйин иштиракчйирин 80 бицIириз дих гъапIну. Дурариз гьарсариз мектебдиз лазим вуйи канцелярияйин алатарин, портфеларин кюмек тувну.

 
Серенжемдиз уч духьнайидар улубкьурайи цIийи урхбан йисахъди тебрик апIури Хив райондин глава Ярмет Ярметовди къайд гъапIганси, аьхиримжи йисари ихь кьягьялари хусуси метлеб айи дявдин операцияйиъ баркаллувалиинди Урусатдин, багъри ругарин маракьар уьрхюра.

 
«Артмиш шулайи наслар ихь мюгькам ва гужли гележегдин умуд ва даягъ ву. Уьлкейин кIулиъ айидари улупнайи месэлйир тамам апIури, гъи мина уч духьнайи баяр-шубарин абйири вари чпин кьувватар ва фикрар, ихь веледар мюгькамди артмиш шулайи уьлкейиъ ислягьвалиинди яшамиш хьпан бадали сарф апIура. Улубкьурайи урхбан цIийи йисахъди учву тебрик апIураза. Учвкан гьарсари хъуркьувалариинди ва ужудар аьгъювалариинди абйир-бабар, мялимар ва ихь район рази апIрувалик умуд кивраза», – гъапну райондин главайи.