Умгьанат Сулейманова
Гъубшу гьяфтайиъ, 15-пи сентябри, Дагъустандин халкьарин сабвалин йигъ къайд гъапIну. Думу машквар йигъан Мягьячгъала шагьриъ, Дуствалин хулаъ РД-йин главайин вазифйир вахтназди тамам апIурайи Фёдор Щукинди, Дагъустандин Огни шагьриъ ерлемиш дубхьнайи Культурайин хулан гъуллугъчи, мяълийирин устад Зарифе Гьясанова «Дагъустан Республикайин культурайин лайикьлу гъуллугъчи» ччвур тувбиинди лишанлу гъапIну.

Зарифе Гьясановайин сягьнайиин ляхин апIури 25-йискьан ву. «Педагогвалин институт ккудубкIнушра, йиз кIваз хуш вуйи пише ктабгъунза ва швумал гъахьундарза. Яратмишвал – думу варидариз тувруб дар. Гьарсар касди чан бажаранвал гьитIибкIну ккундар, думу ашкар дапIну ккунду», – гъапну культурайин гъуллугъчийи ич сюгьбатнаъ.
Зарифе риш вахтнахъанмина музыкайиин юкIв алир вуйи. Уьмриъ дюшюшнануб фукIа адар. Музыкайихьна вуйи гьевес дугъаз чан адаш, адлу музыкант Гъардашбег Султановдихьан гъафиб ву.

 
Гъи магьа ухьуз рякъюрайиганси, Зарифе Гьясанова республикайин лайикьлу артист ву. Дугъан гьарсаб мяъли – чIиви спектакль, сягьнайиина адабгънайи ва дихниинди яратмиш дапIнайи сурат ву. Дюдеригъян гъюрайи дугъан сесну хъпехъурайир кюгьне вахтариз гъахуру. Аьхиримжи йисари дугъу апIурайи мяълийирин арайиъ халкьдин ватанпервервалин мяълийири асас йишв бисура.
Гъи Зарифе Гьясанова Дагъустандин Огни шагьриъ кIули гъахру жюрбежюр мяракйириъ гьевесниинди иштирак шула. Дугъу Дагъустандин вари чIаларииндира мяълийир апIура. Дугъан мяълийирихъ хъпехъуз шагьриъ яшамиш шулайи жюрбежюр миллетарин вакилар гъюру.

Гъит ихь ватанагьли Зарифе Гьясановайиз хъана заан хъуркьувалар ишри.